Цуппаринсæй анзи æнхæст кæнуй, Устур Фидибæстон тугъди советон адæмтæ фашистон Германибæл ку фæууæлахез æнцæ, уобæл. Æма аци алæмæти агъазиау цау кадгинæй исбæрæг кæнуни фæдбæл Уæрæсей арæзт цæуй берæ аллихузон номерæн мадзæлттæ. Зæгъæн, нæ Цитгин Уæлахези цуппаринсæй анзей кадæн Белоруссий сахар Брестæй Уæрæсей Федераций сæйраг сахар Мæскумæ рабалци кодта «Уæлахези эстафетæ». Е рацæудзæнæй, раздæри Советон Цæдеси исконди ка адтæй, еци нури  хуæдбарæ паддзахæдти хонсайраг арæнтæбæл.

Аци арфиаг гъуддаги архайуй Цæгат Иристон дæр. Æрæги нæ республики арæнтæ гъæуайгæнæг æдасдзийнади федералон службæ «Уæлахези эстафетæ» райста Мæхъæли республики арæнтæ гъæуайгæнæг управленийæй. Уой фæдбæл Дзæуæгигъæуи Намуси Аллея мемориали арæзт æрцудæй кадгин фембæлд, архайдтонцæ си нæ республики Хецауади сæрдари хуæдæййевæг Томайти Ирбег, республики арæнтæ гъæуайгæнæг служби разамонгутæ, Дзæуæгигъæуи кадетон кълæсти æма еумæйагахурадон скъолати ахурдзаутæ.

Томайти Ирбег нæ республики Сæргълæууæг Сергей Меняйлой номæй райарфæ кодта мадзали архайгутæн æма загъта:

– Аци эстафетæ рацæудзæнæй нæ республики муниципалон искондти, мемориалон комплекстæ æма æндæр зæрдæбæлдарæн бунæтти. Е ахсгиаг æй, уæлдайдæр ба уомæ гæсгæ, æма нæ  ирæзгæ фæлтæртæ гъæуама бæлвурдæй зононцæ, цæйбæрцæбæл агъазиауæй-агъазиаудæр хъиамæттæ бакодтонцæ нæ Фидибæсти сæребарæдзийнади, нæ Цитгин Уæлахези сæрбæлтау.

Уæлахези эстафети хæццæ баст кадгин мадзæлттæ æма митингтæ Цæгат Иристони зæнхæбæл уодзæнæнцæ 23 апърелæй 30 апърели уæнгæ. Цæгат Иристонæй ба «Уæлахези эстафетæ» лæвæрд æрцæудзæнæй Хонсар Иристонмæ.

ХЕКЪИЛАТИ Маринæ