Украинаг сæрмагонд службитæ, идарддæр сæ знаггадæхæссæн куст кæнгæй, аллихузи «колл-центрти» фæрци архайунцæ Уæрæсей цæргути æхцатæ расайунбæл, кенæ сæ аллихузон фудракæндитæбæл исардаун. Уой хæццæ ма, фæстаг рæстæг нæ нихмæлæугутæ уæхæн архайд фæккарздæр кодтонцæ.

Еци æууæл хинцгæй, Æдасдзийнади федералон служби Цæгат Иристони управлени фæдздзурдта республики цæргутæмæ, цæмæй уæхæн цæстфæлевæн «колл-центртæй» сæхе еуварс даронцæ, финансон æма æндæр уæхæн фарстати фæдбæл æнæзонгæ «консультантти хæццæ» дзубандий рæстæг уонцæ уæлдай къæрцгъос.

Уæхæн «колл-центрти» оператортæ, адæймагмæ телефонæй бадзоргæй, сæхе байамонунцæ, куд Æдасдзийнади федералон служби, Медгъуддæгути министради, Слестгæнæг комитети, «Росфинмониторинг» æма æндæр уæхæн паддзахадон структурити косгутæ. Аллихузон психологон фæрæзнитæй испайда кæнгæй, етæ адæймаги уоди бауадзунцæ  тасдзийнадæ æма дузæрдугдзийнадæ. Тухст адæймаги ба, ке зæгъун æй гъæуй, æнцондæр расайæн æма æртасæн ес. Уæхæн уавæрти си «консультанттæ» архайунцæ се ’хцай фæрæзнитæ расайунбæл, банки «æдас» хигъдмæ сæ раййевунбæл, кенæ ба сæ амидин кæнунцæ æфсæнвæндагбæл исрæмугъдтитæ, сæрмагонд æфсæддон операцимæ барæдарæг адæми рамарун æма æндæр уæхæн террористон фудракæндитæ исаразунмæ.

Уæхæн æбæрæг «оператортæ» уæмæ телефонæй ку дзоронцæ, уæд уайтæккæдæр хæтæл рахецæн кæнетæ, сæ ардауæн миутæ син мацæмæ даретæ.

Уой хæццæ, уæхæн фæлтæрæнтæбæл ку  исæмбæлайтæ, уæд хабæрттæ  бахъæртун кæнун гъæуй барадæгъæуайгæнæг оргæнтæмæ уæхæн телефонтæй:

Æдасдзийнади федералон служби Цæгат Иристони регионалон хайадæ: +7 (8672) 597-311;

Цæгат Иристон-Аланий Медгъуддæгути министрадæ: +7 (8672) 596-502 (кенæ «02», дзиппидаргæ телефонтæй – «102»)». Етæ амунд æнцæ Уæрæсей Федераций Æдасдзийнади федералон служби цæгатиристойнаг управлений пресс-служби игъосункæнуйнаги.

Нæ уацхæссæг