Дзæуæгигъæуи адтæй наукон-практикон конференци «Устур бæстæ. Устур истори. Устур Уæлахез». Æмбурди архайгути размæ радзубанди кодта Республикæ Цæгат Иристон-Аланий Сæргълæууæг Сергей Меняйло.

Конференцимæ исаккаг кодтонцæ республики паддзахадон æма муниципалон хецаудзийнади оргæнти разамонгутæ, ветерантæ æма æндæр æхсæнадон еугæндти минæвæрттæ, наукæ æма культури архайгутæ, ахурдзау фæсевæд…

Сергей Меняйло æ радзубандий фæббæрæг кодта, Устур Уæлахези 80 анзей юбилейи бæнтти уæхæн конференцитæн уæлдай ахсгиаг нисанеуæг ке ес, уой. Æ дзубандимæ гæсгæ, Уæрæсей нихмæ информацион нихмæлæуддзийнадæ ка раседтæй, уонæн дæр гъæуй аккаг нихкуъæрд дæттун.

– Нæ еугур дæр æвдесæн ан, фæстаг дæсгай æнзти дæргъи нæ «хуæрзгæнгутæ» истори фесинмæ кæнунбæл ке архайунцæ, уомæн.

Уони архайдæй дзурдтаг иссæй, Дуккаг дуйнеуон тугъдæн кæрон исæвæрунмæ устурдæр æвæрæн ка бахаста, еци гъуддаг дæр. Фал мах алли 9 Майи дæр дуйней зæрдæбæл æрлæуун кæнæн еци уæлахези аргъ – тугъди азарæй бабун æнцæ 30 миллион советон адæймагемæй фулдæр. Уæхæн зæрдресæн нимæдзитæбæл дзоргæй, ка гъæуама исфæраза, раздæри Советон Цæдеси адæмтæ еумæйаг уæлахезмæ ци æгæрон æвæрæн бахастонцæ, уой дæлдзенæг кæнун? Еци рæстæгути еунæг паддзахадæ дæр нæ бавзурста, мах бæстæ ци зиндзийнæдтæ æма гъезæмæртти сæрти рахизтæй, уони. Уой хинцгæй, нуртæккæ вазуггиндæр нисан æй, цæмæй ирæзгæ фæлтæртæ зононцæ историон рæстдзийнадæ. Алли адæмæн дæр сæйрагдæр уодварнон хæзнатæ ’нцæ æ истори æма культурæ – уони багъæуай кæнунбæл гъæуама æвæллайгæй косæн. Уомæн æма еци уодвæрнон гъомус ку нæбал уа, уæд нæхуæдтæ дæр ци уодзинан? Еу загъдæй, куд лæмбунæгдæр зонæн нæ истори, куд хуæздæр гъæуай кæнæн нæ культури уодварнæ, уой бæрцæ тухгиндæр, федардæр уодзинан, – æ радзубандий фæббæрæг кодта Цæгат Иристони Сæргълæууæг.

Конференций архайгутæ докладтæ искодтонцæ Устур Фидибæстон тугъди сæйрагдæр цаути туххæй, сæрмагондæй æрлæудтæнцæ Кавказбæл тугъдтити нисанеуæгбæл, бафеппайдтонцæ, Иристони хъæболтæ тохи будури æма фæскъилдуни ци бæгъатæрдзийнадæ æма Райгурæн бæстæбæл æновуддзийнадæ æвдистонцæ, еци цæветтонтæ…

Зонадон форумæн фадуæттæ исаразтонцæ Уæрæсей æфсæддон-историон æхсæнади цæгатиристойнаг хайадæ æма Дзæуæгигъæуи бунæттон хеунаффæйади администраци.