АХУРДЗАУИ МАДÆН – ПАДДЗАХАДИ АГЪАЗ

Аци анзи 1 сентябрæй фæстæмæ бонигон ка ахур кæнуй,еци æнæуодбарæ студенткитæн æхцай фæрæзнитæ федуни бæрцитæ  фæффулдæр уодзæнæнцæ дууæ хатти. Уой туххæй игъосун кæнуй Уæрæсей Социалон фонди нæ республики хайади пресс-службæ.

Уæхæн бартæ уодзæнæй, уæлдæр ахурадон уагдæнтти, колледжти, училищети, уæлæнхасæн профессионалон æма наукон организацити бонигон – æнæфедуни дæр æма федуни бундорбæл дæр ка ахур кæнуй, еци студенткитæн.

Нуртæккæ æнæуодбарæ студенткæн ци пособитæ фист цæуй, етæ комкоммæ баст æнцæ сæ ахури нæуæг стипендий бæрци хæццæ. Ахури нæуæг анзæй фæстæмæ ба уомæ каст нæбал цæудзæнæй, фал син фист цæудзæнæй, ци региони цæрунцæ, уоми цæрунæн цæйбæрцæ дехгонд цæуй, уой бæрæггæнæнтæмæ гæсгæ. Нæ республики еци нимæдзæ хъæртуй 17396 сомемæ. Æнæуодбарæ силгоймæгтæн еци æййивддзийнæдтæмæ гæсгæ, уолæфунæн ци 140 бони лæвæрд цæуй, уони пособий бæрцæ исхездзæнæй 80 мин сомемæ. Цæмæй уæхæн пособи райсай, уой туххæй курдиадæ электрон хузи бадæттун гъæуй паддзахадон лæггæдти службæмæ.

Еци курдиади хæццæ ма бавдесун гъæуй, силгоймаг рæстæгмæ косунгъон ке нæй, уæдта кæми ахур кæнуй, уордигæй гæгъæдитæ, уæдта пособи æндæр ке некæми есуй, уой туххæй бæрæггæнæнтæ.

Пособи федуни туххæй унаффæ хаст цæуй, курдиадæ æма иннæ гæгъæдитæ бадæттунæй 10 боней дæргъи.

Пособитæ 2025 анзи 1 сентябрæй фæстæмæ фист цæудзæнæнцæ ахурадон уагдæнтти бæрæггæнæнтæмæ гæсгæ.

ФÆСУРОКТИ УÆГЪДÆ РÆСТÆГ ДÆР ПАЙДАЙАГ КУД УА…

Республики ахуради министрадæн ихæсгонд æрцудæй, скъоладзаутæн сæ ахургæнæндæнтти фæсуроктæ ахур кæнуни куст рапарахатдæр кæнун, цæмæй косгæ ци ниййергутæ кæнунцæ, уонæн фулдæр рæстæг уа сæ комкоммæ кустæн, уæдта ахурдзаутæ дæр пайдайаг гъуддæгутæбæл фулдæр хуæст уонцæ. Куд нисангонд цæуй, уотемæй нæ республики æнæмæнгæ исаразун гъæуй ниййергути форум дæр, цæмæй си еумæйагæй каст æма лухгонд æрцæуонцæ, ци ахсгиаг фарстатæ нæмæ æрæмбурд æй, етæ.