Евгъуд сабати Мæскуй спортивон комплекс «Динамо»-й арæзт æрцудæй профессионалон гъæбесæйхуæсти изæр. Еристæ цудæнцæ уæгъдебарæ, грекъаг-ромаг æма силгоймæгти гъæбесæйхуæсти хузти.

Бонæй ци еристæ цудæй, уоми фиццаг командон ериси фембалдæнцæ Белорусси æма Уæрæсей богæлттæ.

Уæрæсей уæгъдебарæ гъæбесæйхуæсти команди ирон богæлттæ Багати Арслан æма Таугазти Ирбеги архайд рауадæй растауйнаг. Арслан 86 кг уæнгæ уæзи æмгъудæй раздæр фæууæлахез æй æ нихмæлæууæг Илья Храмцовбæл 12:0 хигъдæй, Ирбег ба 97 кг уæнгæ уæзи 10:0 хигъдæй фæууæлахез æй Василий Павлюченкобæл Командон ериси Уæрæсей уæгъдебарæ гъæбесæйхуæцгутæ фæууæлахез æнцæ 13:11 хигъдæй. Силгоймæгти командон фембæлд ба рахецæн æй Белоруссий пайдайæн 14:12 хигъдæй.

Грекъаг-ромаг гъæбесæйхуæстæй Уæрæсей команди Гегкити Азæмæт, 97 кг уæнгæ уæзи хуæцгæй, 4:1 хигъдæй фæууæлахез æй белорусаг богал Владислав Пустошиловбæл. Команди ’хсæн Уæрæсей рамулдта 4:2 хигъдæй.

Еци бон изæрæй уæгъдебарæ гъæбесæйхуæстæй цудæнцæ еристи сæйраг фембæлдтитæ. Уонæй еу адтæй Кцойти Алихан æма америкаг богал Джонатан Айеллойи фембæлд. Сæ нихмæлæуд рауадæй хъæбæр хъазауатон. Уæхæн хъаурæгин нихмæлæууæги хæццæ ериси Алихан равдиста бæрзонд профессионалон цæттæдзийнади хæццæ бухсундзийнадæ. Сæ фембæлдæн Алихан искодта хуарз кæронбæттæн æма рамулдта 5:4 хигъдæй. Æ аци уæлахез дзорæг æй, е абони дуйней хъаурæгиндæр е ’муæзонти хæццæ тох кæнунмæ цæттæ ке ’й, уобæл.

БАСКАТИ Урузмæг