БЕРДИТИ Солтани номерæн турнир исаразгутæ æма кадгин иуазгутæ

Дигорай спортивон-æнæнезгæнæн комплекс «Алькор»-и 8 ноябри уæгъдебарæ гъæбесæйхуæстæй 11-аг хатт рацудæй Бердити Солтани номерæн турнир æригон (2013-2014 æнзти игурд) богæлтти ’хсæн.

Бердити Петри фурт Солтан æ уæлзæнхон царди искодта берæ хуарздзийнæдтæ æ табуйаг фидиуæзæгæн, æ уарзон гъæубæстæн, æмзæнхон дзиллæн.

Дигори райони сæргълæууæг уогæй, зæрдиагæй архайдта райони гъæути æма сахар Дигорай гъæунгтæ хуæрзаййев кæнунбæл. Уомæй уæлдай, Солтан зæрдиагæй архайдта кæстæр фæлтæрти культурон æма спортивон гъомбæладæ ахедгæдæр кæнунæн гъæугæ уавæртæ исаразунбæл дæр.  Æ цардвæндаг, гъулæггагæн, æгæр цубуртæгонд рауадæй, фал ин уæддæр æнтæсгæ ба æгæрон берæ бакодта арфиаг гъуддæгутæ аразунæй. Дзиллæ си хумæтæги нæ фæззæгъунцæ: ку ма ин фæцайдæ равгæ рацæрунæн, уæд ма цæйбæрцæбæл баскъуæлхтайдæ æ еци лæгдзийнадæй.

Уомæ гæсгæ ма ин абони дæр адæм имисунцæ æ рохс ном, цитгин æй кæнунцæ. Уомæн æвдесæн æй е дæр, æма Солтани рохс ном иссерунæн нур цуппæрдæс анзей дæргъи алли анз дæр арæзт æрцæуй кæстæр кари гъæбесæйхуæцгути ’хсæн турнир.

Аци турнир иссæй  гъæугæ гъуддаг кæстæр кари спортсменти дæснидзийнади ирæзт ахедгæдæр кæнунæн.

Цæмæй турнир анзæй-анзмæ уиндгундæр кæна, уобæл зæрдиагæй фæккустонцæ Бердити Солтани фурттæ Вадим æма Витали, æ кизгæ Лорæ  сæ агъазгæнгути хæццæ. Абони еци еристæ хаст æрцудæнцæ паддзахадон программæ «Уæрæсей спорт»-и фæлгæтмæ.

Æригон богæлтти турнир игонгæнгæй син зæрдиаг арфитæ ракодтонцæ: Цæгат Иристони Сæргълæууæги агъазгæнæг Хъуссати Мæирбег, Дигори райони сæргълæууæг Цагъати Сослан, Цæгат Иристони физикон культурæ æма спорти министр Фрайти Сослан æма Цæгат Иристони депутат Бердити Кермен.

Турнир игон кæнуни мадзал сæ аййевадæй барæсугъд кодтонцæ: Иристони адæмон артист Тайсаути Олег, кафгути ансамбль «Арфæ» æма æригон  искурдиадæгин зартæгæнæг Темирати Давид.

Еристи ци æхсæрдæс æригон богали архайдтонцæ, етæ уæлахездзаути бæрæг кодтонцæ 14 уæземи. Алли уæзи дæр адтæй цалдæргай исуйнаг гъæбесæйхуæцæги, æма сæ архайдмæ кæсун хаста зæрдæхцæуæндзийнадæ.

Тæккæ рæуæгдæр уæзи (25 кг уæнгæ) дæсни рахуæстæй æма фиццаг бунат рамулдта Мæздæги райони минæвар астанздзуд биццеу Магомед Закароев.

27 кг уæнгæ уæзи дæр фæууæлахез æй мæздæггаг дæсанздзуд биццеу Зелим Алашев. 29 кг уæнгæ уæзи дигорайаг еуæндæсанздзуд богал Хъалабегти Вадим равдиста хуарз цæттæдзийнадæ æма байахæста фиццаг бунат. 32 кг уæнгæ уæзи æ нихмæлæугутæй сæ еугуребæл дæр фæууæлахез æй никкидæр ма еума мæздæггаг æригон богал дууадæсанздзуд Исмаил Казиев. Мæздæггаг богæлтти сæ еугурей дæр бацæттæ кодтонцæ тренертæ Д. Очеретлов æма Ю. Исмаилов.

Республикон спортивон скъолай гъомбæлкæнуйнаг Дзиццойти Георги фиццаг бунат рамулдта 35 кг уæнгæ уæзи.

Андиати Сослани номбæл спортивон скъолай гъомбæлкæнуйнæгтæ Годизти Ацæмæз (38 кг) æма Дзæгъиати Аслан (31 кг) равдистонцæ хуарз цæттæдзийнадæ æма байахæстонцæ фиццаг бунæттæ. Уотæ рауадæй мæздæггаг биццеу Рамазан Казиеви архайд дæр. Е уæлахездзау иссæй 44 кг уæнгæ уæзи.

48 кг уæнгæ уæзи фиццаг бунат рамулдта Беслæни спортивон скъолай гъомбæлкæнуйнаг Гæрити Марат.

Никки цæмæдесагдæр рауадæнцæ кæронбæттæни еристæ 52, 57, 62, 68 æма 75 кг уæнгæ уæзти.

52 кг уæнгæ уæзи рæсугъд рауадæй Хъарати Аспар (Æрæдон) æма Дзоцъити Æхсари (Дигора) фембæлд. Сæ цæмæдесаг фембæлд рахецæн æй 12:5 хигъдæй Хъарати Аспари пайдайæн.

57 æма 62 кг уæнгæ уæзти кæронбæттæни фиццаг бунæттæ рамулдтонцæ  спортивон скъолай гъомбæлкæнуйнæгтæ – 57 кг уæнгæ уæзи Цæрæхати Сæрмæт æма Елойти Давиди фембæлд рахецæн æй Сæрмæти пайдайæн, 62 кг уæнгæ уæзи Гутъиати Тимур æма Тедети Хетæги фембæлди фæууæлахез æй Тимур.

68 кг уæнгæ уæзи фиццаг бунат рамолунбæл фембалдæнцæ Мæргъити Вадим (Кирови район) æма Сихъоти Хетæг (Æрæдон). Сæ цæмæдесаг тох рахецæн æй Мæргъий-фурти пайдайæн.

Аци кари еугур уæззаудæр уæзи (75 кг уæнгæ) фиццаг бунат байахæссунбæл ериси бацудæнцæ Хъæлицти Алан (Дигори район) æма Дзукъати Арсен (Кирови район). Сæ фембæлди фæууæлахез æй Хъæлицти Алан.

Уæлахездзаутæ æма призон бунæттæ байахæсгутæ хуарзæнхгингонд æрцудæнцæ майдантæ, дипломтæ æма æхцай лæвæрттæй. Сæрмагонд лæвæрттæй хуарзæнхæгонд æрцудæнцæ Хъалабегти Вадим – «Хуæздæр техникон цæттæдзийнадæ», Зелим Алашев – «Уæлахезмæ турнундзийнадæ», Хъæлицти Алан – «Спортуарзгути лæвар», Магомед Закароев – «Тæккæ æригондæр богал».

Еристæ аразгутæ, сæ сæргъи Бердити Вадим, уотемæй сæрмагонд æхцай лæварæй исхуарзæнхгин кодта сæрмагонд æфсæддон операций ка фæммард æй, еци æфсæддон Руслан Расщепкини дууæ биццеуи Сослан æма Азæмæти.

Турнири рацудæн устур аргъ ка искодта, уонæй еу адтæй Цæгат Иристони Сæргълæууæги агъазгæнæг Хъуссати Мæирбег. Æ загъд адтæй:

– Ауæхæн турнир æй устур æма ахедгæ лæвар нæ ирæзгæ фæсевæдæн, рæстмæ сæ разæнгардгæнæг мадзал. Бердити бийнонтæ аци кари æригон богæлттæн ци уавæртæ аразунцæ, е æй фæнзуйнаг хуарздзийнадæ. Кæстæртæ, уæхæн цæстдард уингæй, кæнунцæ нифсгундæр æма тундзунцæ сæхебæл бундоронæй косунмæ. Æхцæуæн æй, Бердити Солтани рохс ном уæхæн рæсугъд æма гъæугæ еристæй ке ерунцæ æ кæстæртæ, е. Æруагæс ни кæнуй, аци рауæн ци лæгигъæдгун кæстæрти уинæн, уони ’хсæн исонибони дуйнеуон чемпионтæ ке ирæзуй, е!