Сæрмагонд æфсæддон операций архайгутæн æма сæ бийнонти иуонгтæн агъаз кæнуни фæдбæл Цæгат Иристони Æхсæнведомствон къамиси кезуй æмбурд æрæги арæзт æрцудæй Дигори райони. Разамунд ин лæвардта нæ республики Хецауади Сæрдари хуæдæййевæг ПЛАТИ Альбинæ. Архайгæ ба си кодтонцæ Дигори муниципалон исконди сæргълæууæг ЦАГЪАТИ Сослан, райони бунæттон хеунаффæйади администраций сæргълæууæги ихæстæ рæстæгмæ æнхæстгæнæг ХОХОЙТИ Валерий, республикон министрадтæ æма ведомствити минæвæрттæ.

Нæ Цитгин Уæлахези 80 анзей кадæн фарæ Дигори райони ци берæ аллихузон цитгингæнæн мадзæлттæ арæзт æрцудæй, уонæн сæ агъазиаудæртæй еу иссæй – сахар Дигорай игонгонд æрцудæй Фидибæсти гъæуайгæнгути Парк. Уой фæдбæл кадгин мадзали архайдтонцæ райони сæргълæууæг Цагъати Сослан, «Аланти нихæс»-и райони Совети сæрдар Къорнати Тотраз, Афганистани ветеранти райони Совети сæрдар Гамахарти Эрик, сæрмагонд æфсæддон операций архайгутæ Къорнати Алан, Цæрикъати Алан, Хъазбегти Геуæрги, Дигорай фиццаг скъолай æригон æфсæддонтæ, сæ разамонæг афицер-гъомбæлгæнæг Василий Биткин.

Парк исаразуни гъуддаги ахедундзийнадæ æгæрон æй. Еуемæй, æгайтима иронх ни нæ кæнунцæ нæ фидтæлти тугъдон хъазауат æма æскъуæлхтдзийнæдтæ, цитгийнаг нин æнцæ, абони нæ Фидибæсти сæрбæлтау æхсаргинæй ка тох кæнуй, етæ дæр. Иннемæй ба, нæ нури ирæзгæ фæлтæртæн дæр е æй гъомбæлади алæмæти фæрæзнæ, уони зундирахасти дæр федар кæндзæнæй нæ хестæрти намусæн аккаг кадæ кæнуни разæнгарддзийнадæ æма Райгурæн бæстæбæл æновуддзийнадæ.

Аци цауи ахсгиагдзийнадæ ма уомæй дæр æй, æма ауæхæн парк нæ республики фиццагидæр ами фæззиндтæй. Уой уомæ гæсгæ баханхæ кодтан, æма аци райони нæ Фидибæсти сæрбæлтау хъазауатгæнгути кадæ æма намус цитгин кæнуни фæдбæл райони разамунди æма дзилли хъæппæресæй арæзт цæуй берæ арфиаг æма бафæнзуни аккаг мадзæлттæ. Сæ еугурей ранимайуни равгæ нин нæййес, фал си кæцидæрти туххæй ба цубурæй ракой кæндзинан. Зæгъæн, фараст скъолайеми æвæрд æрцудæй Фидибæстæ гъæуайгæнгути кадæн еу æма инсæй сæрмагонд номгин партитæ, фондз скъолайеми ба – зæрдæбæллæууæн фæйнæгутæ, дæс скъолайеми – музейон экспозицитæ, станицæ Николаевскийи ба кадетон къласæн лæвæрд æрцудæй сæрмагонд æфсæддон операций архайæг, Æхсардзийнади дууæ орденей кавалер Руслан Ращепкини кадгин ном. Уомæй уæлæнхасæн ма скъолати еудадзугдæр арæзт цæунцæ тематикон къласон сахæттæ, имисæн уроктæ, хуæздæр сочинени ниффинсуни, æртасæн куститæ бацæттæ кæнуни конкурстæ. Хуарз фæткæ иссæй е дæр, æма æфсæддонтæ æма ахурдзаутæ кæрæдземæ финстæгутæ æрветунцæ, цитгин кæнунæн бæласи талатæ сагъд æрцæунцæ зæрдæбæллæууæн Аллейи æма бæгъатæрти номбæл Дзæхæрадæнтти.

Аци æма ма берæ æндæр гъуддæгути æма фарстати фæдбæл цудæй, мæнæ ци æмбурди коййæй райдæдтан нæ дзубанди, уоми. Æмбурд игон кæнгæй, Плати Альбинæ куд баханхæ кодта, уотемæй æнæмæнгæ ахсгиаг фарста ’й сæрмагонд æфсæддон операций архайгутæ æма сæ бийнонтæн берæвæрсуг агъаз кæнун. Фæдздзурдта, цæмæй алли уагæдони минæвар дæр хъæбæр лæмбунæг цæстæй кæса еци категорий граждæнти цигъæуæгтæмæ, гъæугæ хузи син дзуапп  дæтта сæ фарстатæн.

Сæрмагонд æфсæддон операций архайгутæн æма сæ бийнонтæн социалон агъаз кæнуни фæдбæл куст куд æнхæстгонд цæуй Дигори райони, уой туххæй æмбурди бæлвурдæй фегъосун кодта Цагъати Сослан. Æ радзубандий куд фегъосун кодта, уотемæй, райони граждæнтæй  Дигори æма Ирæфи райони æфсæддон комиссаради хæццæ бадзурд ка бафинста, уонæн муниципалон бюджетæй  фист æрцудæй  фæйнæ 100 мин соми еурæстæгон феддони хузи. Сæрмагонд æфсæддон операций архайгутæ æма сæ бийнонтæн, сæ царди уавæртæ фенцондæр кæнуни туххæй федералон агъазæй уæлдай ма район дæр син æхе фæрæзнитæй дех кæнуй. Зæгъæн, уæлдæр амунд граждæнтæ уæгъдæгонд цæунцæ, мулк æма сæ зæнхи хæйттæбæл хъалон федунæй, амалгъонади архайди хæццæ баст ку нæ уонцæ, уотемæй. Уæгъдæгонд ма цæунцæ хъалонтæ афойнадæбæл нæ бафедуни туххæй ивартæй, уæдта еци нæ бафедуни туххæй син сæ фатерти  гъардæттæг æма донуадзæн хæтæлтæ лухгонд нæ цæунцæ.

Сæрмагонд æфсæддон операций архайгути сувæллæнттæн æнæ кезуй лæугæй лæвæрд цæунцæ бунæттæ рæвдауæндæнтти, уой хæццæ ба ма уæгъдæгонд цæунцæ аллимæйон феддонтæй, скъолати дæр син  лæвар лæвæрд цæуй гъар хуæруйнаг. Уой хæццæ ба ма син барæ лæвæрд ес аллихузон къуæрттæ, спортивон секцити архайунæн,  уæдта муниципалон къæпхæни культурон-хеерхæфсæн мадзæлттæмæ лæвар цæунæн.

Цæрæнуатон программи хигъди æнцæ сæрмагонд æфсæддон операций архайгути  фондз бийнонти. Уонæй дууæ бийнонтемæн сæ цæрæнбунæттон уавæртæ хуæздæргонд æрцæудзæнæнцæ аци анз, иннетæн дæр сæ бартæ æнхæстгонд цæудзæнæнцæ фæткæвæрдмæ гæсгæ.

Дигори райони цæргутæй æфсæддон службæй уæгъдæгонд ка ’рцудæй, еци ветеранти нимæдзæ ’й нæудæс адæймаги, уонæй авдемæн се ’хсæн дуккаг къæпхæни инвалид, уотемæй куст лæвæрд æрцудæй. Уонæй еу æй хекустгæнæг, дууæ ба си сæрмагонд гæгъæдитæ æмбурд кæнунцæ, социалон бардзурд исфедар кæнуни туххæй.

Фидибæстæ гъæуайгæнгути парк 2025 анзи майи сахар Дигорай игон кæнуни фæдбæл кадгин мадзали рæстæг. Рахесæрдигæй – Дигори райони сæргълæууæг ЦАГЪАТИ Сослан.

Сæрмагонд æфсæддон операций архайгути хæццæ федар бастдзийнадæ ес «Фидибæстæ гъæуайгæнгутæ»-йи фонди, Дигори райони адæми социалон гъæуайкæнуйнади управлений, социалон лæггæдти Комплексон центри косгути хæццæ. Цæстдард кæмæ цæуй, уони нимæдзæ ’й 487 адæймаги.

Райони æнæнездзийнадæ гъæуайкæнуйнади уагæдæнтти сæрмагонд æфсæддон операций архайгутæн барæ ес кезуй нæ лæугæй, се ’нæнездзийнадæ рагацау  исбæрæг кæнунæн. Аци бони уæнгæ «Фидибæстæ гъæуайгæнгутæ»-йи фонд еу ветерани исефтонг кодта сæрмагонд протезæй, цæмæй æ бон уа спортæй архайун.

Райони разамонæги радзубандимæ гæсгæ бæлвурд дæнцитæй фенхæстдæр кодта Цæгат Иристони социалон райрæзти министри фиццаг хуæдæййевæг Мамайти Анджелæ æма Дигори райони «Фидибæстæ гъæуайгæнгутæ»-йи фонди цæстдарæг Сурхати Иринæ. Аци фонди республикон хайади сæргълæууæг Хетæгкати Маринæ  ба куд баханхæ кодта, уотемæй, сæрмагонд æфсæддон операций архайгутæ æма сæ бийнонтæн агъаз кæнуни фарстатæ кæддæриддæр æнхæстгонд цæунцæ гъæугæ хузи æнхæстæй æма афойнадæбæл.

Сæрмагонд æфсæддон операций ка фæззиан æй, уони рохс нæмттæ цæмæй иронхуати  ма байзайуонцæ, сæ кадæ цæмæй цæра æностæмæ, уобæл æнæмæнгæ гъæуй æновудæй архайун. Аци ахсгиаг фарстамæ æргом раздахгæй, нæ республики аййевади министри  хуæдæййевæг Рæмонти Маринæн æма ахуради министри хуæдæййевæг Габети Вадимæн сæ дзубандий сæйраг гъуди адтæй, цæмæй нæ хъайтарти лæгдзийнади туххæй фулдæр æма бæлвурддæр æрмæг æмбурдгонд цæуа. Ахургæнæндæнтти сæ номбæл æвæрд цæуонцæ сæрмагонд мемориалон фæйнæгутæ, фарсбæл газеттæ, хъайтари номбæл партитæ…

Еци гъуддаги дæр Дигори райони, мæнæ ’й  нæ радзубандий райдайæни ку загътон, берæ аллихузон арфиаг хъæппæрестæй æскъуæлхуй. Ес сæмæ, бафæнзун сæ цæмæй æнгъезуй, уæхæн фæлтæрддзийнадæ.

Æмбурди рæстæг Цæгат Иристони æнæнездзийнадæ гъæуайкæнуйнади министри хуæдæййевæг Хетæгкати Фатимæн ба æ радзубанди адтæй сæрмагонд æфсæддон операций архайгутæн æма уони бийнонтæн афойнадæбæл медицинон, психологон æма сæрмагонд агъаз дæттуни ахсгиагдзийнади фæдбæл. Æма аци куст Дигори райони куд æнхæстгонд цæуй, уой туххæй бæлвурдæй фегъосун кодта райони адæмæн социалон лæггадæкæнуйнади Комплексон центри  сæргълæууæг Беккузарти Артем.

Нæ республики физикон культурæ æма спорти министри хуæдæййевæг Хуадонти Артур ба æмбурди архайгути базонгæ кодта сæрмагонд æфсæддон операций ка фæссахъат æй, уотемæй спорти архайун ке фæндуй, уонæн гъæугæ уавæр исаразунæн ци мадзæлттæ æнхæстгонд æрцудæй æма исонибонмæ ци исаразуйнаг æнцæ, уой туххæй. Æ загъдмæ гæсгæ, сæ гъуди бацæттæ кæнуйнаг æнцæ, еци адæми хæццæ косунæн арæхстгин аккаг тренертæ. Сахар Дзæуæгигъæуи тагъд рæстæги байгон уодзæнæй физкультурон-æнæнезгæнæн центр, кæцими спортæй архайун сæ бон уодзæнæй, сæрмагонд æфсæддон операций ветерантæн дæр. Дигори райони спортивон комплекстæ гъæуама сæ куст раздахонцæ нæуæг уавæрти архайунмæ: ефтонггонд æрцæуонцæ нуриккон спортивон дзаумæуттæй, уой хæццæ ба ма си гъæуама уа цæстæй сахъат граждæнтæн æнцон кæсæн нисантæ…

Цæгат Иристони цифрон æвдесæйнæгтæ парахат кæнуни Комитети Сæрдар Даниил Гахов куд загъта, уотемæй аци къабази ци нæуæгдзийнæдтæ фæззиндтæй, уони фæрци фæццубурдæр уодзæнæнцæ, сæрмагонд æфсæддон операций æма  сæ бийнонтæн агъаз кæнуни мадзæлтти æмгъудтæ.  Уонæй нур берети  бон æй Паддзахадон лæггæдти портали æма берæкъабазгин центр «Мои документы»-йæй пайда кæнун. Æмгустади электрон каналтæй бастдзийнадæ цæмæй уа еугур министрадти æма уагæдæнтти хæццæ дæр, уобæл дæр куст цæуй.

БИЧИЛТИ Алетæ