Отпуски рæстæг бауæр лæмæгъ кæнун райдайуй, фæййахур уй æнцон цардиуагæбæл. Уæхæн рахаст фæззиндæр кæнуй косæги рацуд фæллойнадон архайдмæ, цалинмæ кустбæл нæуæгæй фæййахур уй, уæдмæ.

Уомæй уæлдай, фæллойнадон уагæвæрдмæ рахезуни фæсте адæймагмæ нихмæвæрддзийнæдтæ дæр фæззиннунцæ фæндитæ æма æ ихæсти ’хсæн. Фал сæбæл берæ гъуди кæнæн нæййес. Кустмæ рацæугæй, зийнадæ еуварс кæнун гъæуй, цæмæй æвæлмастæй æрлæууай дæ кусти бунати, æма уой туххæй ба æнхæст кæнун гъæуй 7 хумæтæг домæни.

1. Уотæ исаразетæ, цæмæй фæлладуагъдæй кустмæ рацуд ма рабæрæг уа уæ рахастбæл. Кæд отпуск кенæ фæлладуадзæн бæнттæ æндæр рауæн æрвистайтæ, уæд байархайетæ кустмæ рацæунæй еу-дууæ бони раздæр хæдзарæмæ раздæхун. Е уин устур агъаз фæууодзæнæй кустмæ æнцондæрæй раздæхунæн.
2. Кустмæ рацæуни фæсте еугур гъуддæгутæ æнхæст кæнунмæ ма фæллæборетæ, сауæнгæ уæ фæсте куст кæд никъкъулумпи æй, уæддæр. Минкъийгай архайун райдайетæ, кусти радæн пълан искæнгæй. Исаразетæ æвæстеуатæй æнхæсткæнуйнæгти номхигъд дæр, æма уонæй уæ куст райдайетæ.
3. Фиццаг дууæ-æртæ бони косун гъæуй æнцондæр уагæвæрдти. Куд нæ ранигъулайтæ, уой туххæй байархайун гъæуй хумæтæг гъуддæгутæй райдайун, кенæдта гæнæн ес, æма бахаудзинайтæ тухст уавæри. Идарддæр рæдудтитæ кæнæн нæййес, цæмæй ма расайонцæ лугъуздæр фæстеугутæ.
4. Отпуск кенæ бæрæгбæнтти фæсте фиццаг цалдæр бони кусти ма байзайетæ 18:00 сахаттемæй фæстæдæр. Кæд гæнæн уа, уæд байархайетæ еуминкъий раздæр рацæунбæл æма рацо-бацо ракæнетæ кæдзос уæлдæфи.
5. Кусти ци берæ гъуддæгутæ бамбурд æй, уонæй кæд нæййес хе райеуварс кæнæн, уæд алли сахат дæр минкъий рауолæфетæ, рæфтади фæсте ба, æнæмæнгæ, рацотæ гъæунгæмæ æма уæхе райерхæфсетæ.
6. Кустмæ раздæхуни фæсте фиццаг фæлладуадзæн бæнтти ма байевдæлетæ уæ фатертæ æфснайунбæл, не ’нгъезуй рæзæдæнтти, будуйрон куститæ æма æндæр архайд кæнун. Ци уæ фæндуй, уонæй уæхе гъæуагæ ма ниууадзетæ, ахиддæр цотæ фестæгæй, цотæ киномæ, иуазæгуати, аллихузон зæрдæигъæлдзæггæнæн мадзæлттæмæ.
7. Отпуски рæстæг беретæ исахур унцæ æндæр фæткæбæл, дзæвгарæ фæстæдæр исистунцæ сæумæй, уæддæр ма сæ хуссæг фæййахæссуй. Уомæ гæсгæ, аци ахур зин фехалæн фæууй отпуски фæсте. Бауæрбæл цæхгæр æййивддзийнæдтæ цæмæй ма фæззиннонцæ, уой туххæй байархайетæ раздæр хуссæнуат байагорунбæл. Уомæн æма уæмæ сæумæй цæйбæрцæ фулдæр хъауритæ уа, уойбæрцæ æнцондæрæй цæудзæнæй уæ куст.

БЕСЛЕХЪОТИ Иринæ, дохтир.