Аци анзи 24 февралӕй абони уӕнгӕ Уӕрӕсей Хецауади унаффӕй нӕ республикӕ райста 380 миллион соми. Уонӕй, зӕгъӕн, 150 миллион соми – промышленности райрӕзти аллихузон регионалон программитӕн, 100 миллиони – тагъдаразӕн фусунуӕтти арӕзтадӕн, 2 миллион сомемӕ хӕстӕг – дзол ӕма дзоли ӕндӕр хузти продукци цӕттӕгӕнӕн кустуӕттӕн сӕ хӕрзти хай бафедунӕн.

Аст анземӕй ба ӕхсӕрдӕс анзей уӕнгӕ кари сувӕллӕнттӕ кӕми ес ӕма материалон ӕгъдауӕй нӕхъӕртондзийнадӕ ка ӕййафуй, еци бийнонтӕй фӕййагъаз син кӕнуни туххӕй курдиӕдтӕ ист цӕудзӕнӕй 1 майӕй фӕстӕмӕ. Уӕхӕн курдиӕдтӕ есуни туххӕй Пенсион фонд ӕма берӕфункционалон центртӕ косдзӕнӕнцӕ фӕлладуадзӕн бӕнтти дӕр (1-3 ӕма 7-10 майи) сӕуми 9 сахаттемӕй изӕри 18 сахаттей уӕнгӕ.

Поезд «Уӕлахез», куд амӕйразмӕ дӕр, уотӕ бабӕй аци анз дӕр иссудӕй Цӕгат Иристонмӕ. Дзӕуӕгигъӕуи ӕфсӕнвӕндаги вагзали ибӕл цитгинӕй исӕмбалдӕнцӕ. Уой фӕдбӕл ами ци берӕ адӕм ӕрӕмбурд ӕй, етӕ – тугъди ветерантӕ, хецаудзийнади минӕвӕрттӕ, фӕсевӕдон организацити иуонгтӕ, бархеуонтӕ. Ами перрони арӕзт ӕрцудӕнцӕ кадӕгӕнӕг мадзӕлттӕ дӕр. Историон поезд арӕзт ӕрцудӕй 2010 анзи ӕма уӕдӕй абони уӕнгӕ бабӕрӕг кодта нӕ бӕсти 42 ӕфсӕнвӕндаггон станци.