Мæскуй косæг балций уогæй, Республикæ Цæгат Иристон-Аланий Сæргълæууæг Сергей Меняйло Даниловаг моладзандони фембалдæй Мæскуйаг æма еугур Уæрæсей Сугъдæг Патриарх Кирилли хæццæ æма Дзæуæгигъæуккаг æма Алайнаг епископ Герасими хæццæ.

Фембæлди рæстæг  Сергей Меняйло фæббæрæг кодта, республики паддзахадон-аргъауæнон рахаститæ æнтæстгин ке ‘нцæ, уой. Никки епископи бунат 2021 анзи Герасим ку байахæста, уæд бустæгидæр.

Дзубандий рæстæг сæйрагдæр адтæй 2022 анзи Аланибæл исаргъуди 1100 анзи исбæрæг кæнун. Сугъдæг Патриарх Кирилл куд байамудта, уотемæй 1100 анзи устур юбилей æй, гъæуама имæ æмхузонæй не ‘ргом раздахæн. Куд бафеппайдта, уотемæй Аланибæл исаргъуд фæббæрæг æй еугур Уæрæсебæл дæр, бустæгидæр æ хонсайраг хайбæл.

Фембæлди архайгутæ фæннисан кодтонцæ юбилеймæ нисангонд мадзæлттæ, бæрæгбони хæццæ баст фарстатæ. Сæйраг гъуддæгутæ конд æрцæудзæнæнцæ аци анзи сентябри.

Редакцийæй:

Аланий исаргъуди 1100 анзей фæдбæл нуриуæнгæ дæр нæ газети мухургонд цудæнцæ æма ма идарддæр дæр мухур кæндзинан аллихузон æрмæгутæ. Уомæ гæсгæ ба нæ зæрдæ дарæн уобæл, æма нин еци гъуддаги фæййагъаз кæндзæнæнцæ ахургæндтæ, публицисттæ, уæдта ести цæмæдесаг æрмæгутæ нæ газеткæсгутæй кæмæ ес, етæ дæр. Уæд цитгин юбилей æнхæстдæрæй æма федауцæдæрæй исбæрæг кæндзинан.