Колити Виталийæн е ’мдзæвгити æмбурдгонд «Сæхолæ» ку фæззиндтæй (1997 анзи), уæд ибæл поэт Тобойти Цæрæг ци зæгъуйнæгтæ ниффинста, уонæй абони кæцидæрти мухур кæнæн.

* * *

Ес дигорон литературæ. Ес æма ирæзуй есгæй æхемæ нæ доги рес æма мæтæ, итаугæй æууæнкæ æма уарзт адæми зæрдити. Е æй агъазиау æхцæуæндзийнадæ æма хуарз гъуддаг. Уотæ ке ’й, уомæн æвдесæн æй Колити Виталий æмдзæвгити æмбурдгонд «Сæхолæ». Сæхолæ ’й сауæдони ном. Хумæтæги не ’схудта поэт е ’мдзæвгити æмбурдгонд еци номæй. Колий-фурти æмдзæвгитæ дæр сауæдонау цæунцæ зæрди арфæй, æнцæ сауæдонау рæсог, дæттунцæ зæрдæ æма зундæн æрмæг ирæзунмæ, бæттунцæ рæсугъд æнкъарæнтæбæл, хонунцæ ’й рохсмæ, кæнунцæ ’й нифсгин, æууæнкгин. Зæрди игурун кæнунцæ адæймагуарзон гъудитæ.

Колий-фурти поэзи нæй еугæндзон хуæст царди еу фæззиндбæл. Поэт турнуй царди алли къабæзтæ равдесунмæ. Уотæ ку зæгъон, æма бæлвурдæй раздæр æхецæн ихæсæн ниввардта, царди еукæцидæр фæззиндбæл ниффинсон, зæгъгæ, уæд раст нæ уодзæнæн, уомæн æма уæхæн æмдзæвгитæ фæуунцæ æнæуод, уомæн æма лæхурд не ’рцæунцæ зæрди куройни, не ’сфицунцæ поэтти тоги. Æмдзæвгæ игуруй зæрди рист æма устур мæтæй, æцæг уарзти артбæл фицгæй. Виталий æмдзæвгитæ уæхæн хузи райгурдæнцæ æма уомæн агайунцæ зæрдæ. Цард бонæййевгæй æнæмæти не ’рветуй, фал алли ристæй дæр ресуй, тæхсуй æ зæрдæ. Царди ин адæгон неци ес, егауй æй алцидæр, райдайæ æрдзи нивтæй æма фæууо уарзондзийнадæй. Зæнхæ дон куд фæцъцъируй, уотæ цъируй поэти зæрдæ дæр цард, æма си уотемæй райгуруй æцæг цæрунгъон æмдзæвгитæ.

* * *

Колити Виталий киунугæ «Сæхолæ»-йи туххæй дзоргæй, Тобойти Цæрæг æ зæгъуйнæгтæн искодта мæнæ ауæхæн кæронбæттæн: «Табуафси,  Колити Виталий поэзий сауæдонæй баниуазетæ, фидбилиз уи некæмæн æрхæсдзæнæй, æвдадзи хуасæ ’й зæрдæ æма зундæн, æхцæуæндзийнадæ ба син ратдзæнæй».