Кæддæр уырыссаг поэт Федор Тютчев фыста: тæхудиаг у, ацы дунейы фыдæвзарæнты чи царди, уый. Мах цæрæм фыдæвзарæн дуджы, фæлæ нæ хъысмæт бæллиццаг нæу. Нæ рæстæг нæу поэзийы рæстæг. Йæ уынæры дардмæ нæ хъуысынц фæндыры зæлтæ, æхгæд зæрдæтæм нæ хъары поэтикон ныхас. Иудадзыг мигъ кæм бады, уым хур ничи уыны.  Æдзух хъæрахст кæм цæуы, уым ничи хъусы фæдисы дзæнгæрæг дæр.

Афтæ у нæ уавæр. Ахæм уавæры та курдиат вæййы аууоны. Нæй йæ уынæг, нæй йæ хъуыдыгæнæг. Адæймаг пайдайы сæраппонд тохы куы бацæуы, уæд æй не ’ндавы нæдæр Сырдоны хъарæг, нæдæр Ацæмæзы зарæг. Уый трагедион уавæр у поэтæн дæр æмæ адæмæн дæр.

Колиты Витали ахæм рæстæджы куы нæ цæрид, уæд уаид зынгæ поэт, уаид номдзыд лæг, йæ дзырдæн уаид аргъ æмæ кад. Фæлæ рæстæг нæ фæндонæй æвзаргæ нæу. Лæгæн йæ уаргъы баст цы ис, уый хæссын хъæуы, кæд зын æмæ уæззау у, уæддæр.

*  *  *

Колиты Виталийы сфæлдыстдон курдиат у æрдзон æмæ цардхъом. Ис ын поэты зæрдæ – уый æнкъары царды улæфт, æрдзы фидауц, уарзты тавиц. Афтæ æнкъары дзырды ад æмæ поэзийы зæлынад дæр. Уыцы æууæлтæй æвзæры æмæ рæзы йæ уацмысты фæлмæн лиризм, йе стихы музыкалон нывæст, йæ поэтикон аивад.

*  *  *

Витали хъуыдыджын у. Йæ цæст у уынаг. Уыны царды быцæутæ, йæ бон у зæрдæмæ ныккæсын, адæймаджы æнкъарæнтæ иртасын. Уымæ гæсгæ æцæгдзинад æвдисы йæ алы хуызты, цард æмæ рæстæг ныв кæны æппæтвæрсыгæй. Поэты æмдзæвгæты æмзæлланг кæнынц цин æмæ хъыг, арвнæрд æмæ хуры тынтæ.  .

Бæрзонд у поэзийы æфцæг. Зын æмæ бырынцъаг сты йæ цæуæнтæ. Фæлæ æнтысы, чи цæуы, уымæн. Хорзæй æнтысы Виталийæн уыцы æфцæгмæ схизын.

ДЖЫККАЙТЫ Шамил, Цæгат Ирыстоны адæмон поэт