Цæгат Иристони Сæргълæууæг Сергей Меняйло фембалдæй сæрмагонд регионалон ахурадон программæ «Æхсаргин Иристон»-и кæронбæттæни архайгути хæццæ. Куд зонæн, уотемæй аци проекти архайунцæ сæрмагонд æфсæддон операций ветерантæ.

Аци бæнтти рахецæн æй ахурадон семинарти æртиккаг къæпхæн, сæйрагдæр си адтæнцæ хецаудзийнади регионалон æма муниципалон оргæнти æнхæстбартæ, сæ аллибони кусти ахсгиагдæр фарстатæ. Цалдæр боней дæргъи программи архайгути хæццæ кустонцæ республикон министрадтæ æма ведомствити разамонгутæ – фæххай син кодтонцæ сæ зонундзийнæдтæ æма фæлтæрддзийнадæй. Ахурадон лекцитæ ба амудтонцæ Уæрæсей Федераций Президенти размæ Паддзахадон службæ æма адæмон хæдзаради академий ахургæндтæ æма иннæ специалисттæ.

Программи архайгутæн практикон фембæлдтитæ исаразтонцæ хецаудзийнади оргæнти, æнæнездзийнадæ гъæуайкæнуйнади, культури, спорт æма социалон лæггæдти косæндæнтти. Ахурти æртиккаг къæпхæни кæронбæттæни алкедæр ниффинста тесттæ æма равардта фæлварæнтæ.

Фембæлди райдайæни Сергей Меняйло сæрмагондæй фæббæрæг кодта, программи архайгутæ ахуртæмæ цæмæдесдзийнадæ ке ’вдесунцæ, еугур ихæслæвæрдтæ дæр лæмбунæгæй æнхæст кæнунцæ, райгурæн республикæн пайдайаг специалисттæ исунмæ ке бæллунцæ, уой.

– Программи уагæвæрдтæбæл косгæй, байархайдтан, цæмæй сумах берæвæрсуг профессион æма уодварнон райрæзтæн уа гъæугæ уавæртæ, цæмæй уи алкедæр æнхæстæй равдеса æ гъомус. Æруагæс ми кæнуй, семинартæ æма иннæ ахурти ци нæуæг зонундзийнæдтæ æма фæлтæрддзийнадæ райсайтæ, е уин федар бундор ке исуодзæнæй уæ идарддæри цардархайди нæуæг æнтæстдзийнæдтæн, – загъта Цæгат Иристони Сæргълæууæг.

Ахурадон æма лекцион семинарти æртиккаг хай кæд рахецæн æй, уæддæр программи архайгутæн уæгъдæ рæстæг берæ нæ уодзæнæй: нур ба сæмæ æнгъæлмæ кæсунцæ стажировкитæ хецаудзийнади оргæнти, уæдта сæ рауагъдон проекттæбæл куст…

Фембæлди архайгутæн адтæй региони разамонæгмæ сæ фарстатæ раттуни фадуат. Етæ баст адтæнцæ профессион ахурадæ раизолдæр кæнуни хæццæ, кусти бунæттæ дæттуни хæццæ, сæрмагонд æфсæддон операций архайгутæ æма сæ бийнонтæн социалон агъаз æма æндæр уæхæн гъуддæгути хæццæ. Алли фарста æма курдиади фæдбæл дæр райстонцæ лæмбунæг дзуæппитæ.

Дзубандий архайæг адтæнцæ, хæстæгдæр рæстæг æфсæддон-патриотон гъомбæлади центр «Авангард»-и ахуртæ кæмæн райдайдзæнæнцæ, сæрмагонд æфсæддон операций еци архайгутæ дæр. Аци æригон тугъдонтæ ба сæ ахурти фæсте косун райдайдзæнæнцæ скъолатæ æма æндæр ахурадон косæндæнтти директорти æфсæддон-патриотон гъомбæлади фарстати фæдбæл хуæдæййевгутæй.

Цæгат Иристони Сæргълæууæг æма Хецауади пресс-службæ