Æрбахæстæг бабæй нæмæ кæнуй нæ цитгиндæр бæрæгбæнттæй еу – Фидибæстæ гъæуайгæнгути Бон. Æма уой исбæрæг кæнунмæ нæхе цæттæ кæнгæй, нæ гъудитæ фулдæр баст æнцæ сæрмагонд æфсæддон операций туфули ка ’й, нæ еци иристойнаг тугъдонти хæццæ.

Нæ тугъдонтæ, кæд æма абони идардгомау æнцæ сæ райгурæн зæнхæй, уæддæр сæ сагъæсти ба нæ хæццæ ’нцæ, æма нин нуртæккæ нæ бæгъатæр æнсувæртæбæл байауодуни, сæ зæрдитæ син Иристонæй æрвистæгтæй барохс кæнунæн ес дессаги фадуат. Еу загъдæй, байархайæн, цæмæй 23 февраль нæ лæхъуæнтæн исуа æцæг бæрæгбон.

Уомæн æнæмæнгæ агъаз фæууодзæнæй, Еугуруæрæсеуон адæмон фронти цæгатиристойнаг хайадæ æма Дзæуæгигъæуи Иристойнаг райони социалон лæггæдти центри хъæппæресæй, «Æрвистæг æфсæддонæн», зæгъгæ, ци еугурадæмон акци арæзт цæуй, е. Уадзæ æма Фидибæсти алли гъæуайгæнæг дæр банкъара Иристони цæргути ауодундзийнадæ, е ’мзæнхонти æрвист гъар уæледарæс æма хуæрзадæ хуаллаг, сувæллæнтти финстæгутæ æма хе къохæй конд лæвæрттæ ин æ гъомусбæл æфтауонцæ.

Сæрмагонд æфсæддон операций тæлмæмæ хунтæ æрветунвæндæ ка кæна, еци адæмæн фæббæлвурддæр кæндзинан æрвистæгти номхигъд. Уони нимæдзи дæргъвæтийнæ рæстæг ка нæ исæфуй, уæхæн хуаллаг (цай, къофи, ниуазæн дон æма æндæр уæхæнттæ), гъар уæледарæс, санитарон кæдзосдзийнади фæрæзнитæ. Æма, ке зæгъун æй гъæуй, сувæллæнтти финстæгутæ æма хузтæ – етæ уæлдай æхцæуæн фæуунцæ тугъдонтæн.

Гуманитарон æрвистæгтæ бахæссæн ес акций штабмæ уæхæн адресбæл: Дзæуæгигъæу, Димитрови гъæунгæ, 2. Еугур исæвзургæ фарстатæ дæр раттæн ес уæхæн телефонæй: 70-70-08.