Цæгат Иристони кæронмæ рахъæрттæй дони хæдзаради инфраструктури  еугур муниципалон объекттæ дæр паддзахадон унитарон кустуат «РПВВ»-йи дæлбарæ æрбамбурд кæнуни куст. Нуриуæнгæ еугур районти донæфсесади системитæ дæр (байзадæй ма си цалдæр цæрæн бунати донуадзæнти юридикон статус исфедар кæнун) республикон кустуати бæрни бакодтонцæ.

Юридикон æма æндæр организацион фарстатæ лух кæнгæй, «РПВВ»-йи разамунд архайуй донæфсесади системи куст нæуæг фæткæбæл райаразунбæл.

Уотæ, фиццаградон фарстатæй еуебæл нимад æй, кустуатæн районти ци хайæдтæ фæззиндтæй,  уони нæуæг техникæй ефтонг кæнун. Специалисттæ куд зæгъунцæ, уотемæй нуриуæнгæ районти донуадзæнти кустуæттæмæ хе экскаватортæ æма æндæр гъæугæ техникæ æстæн адтæнцæ. Æма дони хæтæлтæ ку ратониуонцæ (кенæ æндæр аварион куститæ кæнун ку багъæуидæ), уæд техникæ курдтонцæ æндæр организацитæй. Еци æууæл, ке зæгъун æй гъæуй, къулумпи кодта коммуналон фидбилизти фæстеугутæ еуварс кæнуни æмгъудтæ.

Цæмæй уотæ мабал уа, уой туххæй районти дæлхайæдтæн æлхæд цæуй нæуæг техникæ. Зæгъæн, Дигори райони филиалæн радех  кодтонцæ дууæ экскаватори æма дууæ хуæдтолги «УАЗ Фермер»-и. Еци техникон фæрæзнитæй пайда кæндзæнæнцæ Дигорæ æма Ирæфи районти.

– Нуриуæнгæ  багъæуаги сахатти гъæугæ техникæ аренди истан. Нур еци кустæй ервæзт ан. Нæуæг техники фæрци пъланон кенæ аварион куститæ, æнæмæнгæ, зингæ фæррæвдзæдæр уодзæнæнцæ, –  зæгъуй «РПВВ»-йи Дигори райони филиали хецау Тауасити Сослан.

Нæуæг экскаватор æма хуæдтолгæ «УАЗ Фермер» лæвæрд æрцудæнцæ Горæтгæрон районæн дæр. Нæуæг техникон фæрæзнитæ бакодтонцæ кустуат «Коммунресурсы»-йи бæрни (аци организаци дæр хæстæгдæр рæстæг исуодзæнæй «РПВВ-йи дæлхайадæ).

– Нуриуæнгæ ци техникæй пайда кодтан, уобæл 20 анземæй фулдæр цудæй. Ахид фехæлидæ, æма бабæй нæ куститæ фæкъкъулумпи уиуонцæ. Нур нæ кустадон æнтæстдзийнадæ зингæ ке фæгъгъомусгиндæр уодзæнæй, уомæй мæ нифс ес, – радзурдта «Коммунресурсы»-йи хецауи хуæдæййевæг Дзеранти Валери.

Уæхæн бæлвурд фæтки бундорбæл архайд цæудзæнæй иннæ лухкæнуйнаг фарстатæбæл дæр.

Нæ уацхæссæг