Уогæ ба ци ресагæ æма бухсагæ  æй зæрдæ… Дууинсæй бони райевгъудæй, Колити Виталийæй æнæнгъæлти ку æрбаседзæр ан, е ’носон дуйнемæ ку банæхстæр æй æма нæ хъонцгæнгæ ку фæууагъта, уæдæй… Дууинсæй бони цанæбæрæг рæстæг æнцæ, зæрдæ æ ристæй не ’нцайуй… Имисæн æй æдæхсæвæ-æдæбонæ… Имисæн æй нæ газети сæрмагонд номери рауагъдæй дæр…

Имисæн ин æ цардвæндаги хабæрттæ, æ зæгъдтитæ æма фæдзæхститæ. Е ’мдзæвгитæй еуеми уотæ финста:

Ци фæццардтæн, уоми æз фæццардтæн,

Цæмæй уа кæдзосдæр нæ дуйне…

Æма ин æ царди еци æгъдауæй æнтæсгæ дæр берæ кодта. Кæддæр «зин мин адтæй цæрун рæстуодæй…», зæгъгæ, кæд загъта, уæддæр æ уодиконд некæд раййивта, гадзирахаттæй ибæл некæд рацудæй:

Адæмбæл нæ кодтон устурзæрдæ,

Мæнгæ дзурд некæд кодтон æцæг…

Уотæ ке адтæй, е æруагæс кæнуй, кадæриддæр æй зудта, уонæй. Æма ин рæстзæрдæ кадæ кодтонцæ. Уой æхуæдæг куд нæ уидтайдæ, фал уæддæр æ зæрдæ ба, æвæдзи, æхсайдта:

Адæймаг иссеруй царди радæ,

Уæлæбæл ку нæбал фæууй, уæд.

Кæдимайдима еци кадæ

Мæнæн дæр æрхæссидæ мæлæт…

Дзæгъæли гъенцъун кодта уæхæн сагъæстæй. Адæми ’рдигæй кадæй хайгин адтæй æ уодæгасæй дæр, арфиаг си уогæй ин кадæгонд цæудзæнæй фæлтæрæй-фæлтæрмæ дæр.