20 майя 2024

«ХЪÆБÆР МÆ РАЗÆНГАРД КОДТОНЦÆ СÆРДИГОН ÆРДЗИ АЛÆМÆТИ ХУЗТÆ!..»

29.07.2023 | 22:10

Æригон хузæгæнæг Елхъанти Милани конд хузти равдист «Балæвар мин кæнæ деденгутæ», байгон æй Дзæуæгигъæуи. Æдеугурæй си ес дæс хузи, фулдæр си æвдист цæунцæ сæрди хуарæнтæ, фæлгонцтæ. Миланæ æхуæдæг куд загъта, уотемæй сæ финста фæстаг дууæ мæйей дæргъи, æ кусти рæстæг æй хъæбæр разæнгард кодтонцæ сæрдигон рæсугъд æрдзи алæмæти хузтæ, æ кустити хъæбæр берæ ес деденгутæ. Цалдæр хузи ба сæйраг бунат байахæстонцæ кизгутти сорæттæ. Иннетæ ба ’нцæ натюрморттæ.

Е æй Милани хузти хе фиццаг сæрмагонд равдист. Хузтæ кæнун райдæдта цалдæр анзей размæ, 2019 анзæй фæстæмæ ба архайдта аллихузон аййевадон равдистити.

Елхъанти Милани хузти равдист уодзæнæй еу мæйи бæрцæ. Фæууинæн ба син ес Горькийи æма Ленини гъæунгти тегъæбæл азгъунсти, федун нæ гъæуй.