Рæстæг æ искондмæ гæсгæ æгъатир æй – куд евгъуйгæ цæуй, уотæ аууон кæнуй адæмæн зæрдæбæлдаруйнæгтæй берæ цидæртæ. Уæддæр алцидæр фæссатар кæнунгъон ба нæй. Уотæ нæ дзиллæй цийфæнди берæ рæстæгутæ ку рацæуа, уæддæр нæ иронх кæнунцæ нæ Фидибæсти сæрбæл хъазауатонтæ, уæлдайдæр уой фæдбæл æ цард ка иснивонд кодта, уони рохс нæмттæ!..

Æвддæс æма инсæй анзей размæ – 1989 анзи 15 феврали –   нæ Фидибæстæмæ æрбаздахтæнцæ, Афганистани зæнхæбæл æ интернационалон ихæс ка ’нхæст кодта, еци Советон æфсади хæйттæ еугурæй дæр.

Еци цау цийнаг куд нæ иссайдæ нæ дзиллæн – уоййадæбæл ке банцадæй, дæс анзей дæргъи ка фæццудæй, еци тугъд. Фал еци цийнæй еугурæй нæ фæххайгин æнцæ – еци тугъди архайгутæй беретæ фæммард æнцæ. Уомæ гæсгæ ба 15 февраль нæ Фидибæсти еугур рауæнти дæр бæрæггонд фæццæуй куд тугъдонтæ-интернационалистти номерæн Бон. Еци бон фæййимисæн не ’дзард тугъдонти рохс нæмттæ, исцитгин кæнæн, еци тугъди архайгутæй абони не ’хсæн ка ’й, уони.

Уотæ аци анз дæр бабæй 15 феврали нæ республики еугур рауæнти дæр æнхæстгонд æрцудæй берæ аллихузон мадзæлттæ. Уотæ Хæзнидони дæр. Уоми зундгонд журналист Сосранти Жаннæ æма æ æмархайгути хъæппæресæй исаразтонцæ дессаги зæрдæмæдзæугæ мадзал. Æрбахудтонцæ имæ тугъдонтæ-интернационалистти, уонæн сæ хеуæнтти, зæрдиагæй си архайдтонцæ гъæуи цæргутæ дæр æма æндæр рауæнтæй иуазгутæ дæр.

Уони барæвдаунæн гъæуи астæуккаг скъолай ахурдзаутæ æма ахургæнгутæ бацæттæ кодтонцæ медесгун программæ, гъæздуг адтæй æмдзæвгитæ æма зартæй, равдистонцæ си, еци тугъди лæгдзийнадæ æма ’хсарæ ка равдиста, еци тугъдонти цардвæндаги туххæй видеоæрмæгутæ.

Мадзали цитгин иуазæг, Бæтоти Ольгæ, тугъдон-интернационалисти мадæ, радзурдта, æ фурт Святославæй финстæгутæ ку нæбал иста, уæд æхуæдæг куд ранæхстæр æй, берæ зинтæ æма маст бавзаргæй, Афганистанмæ æ фурти ирисхъæ базонуни туххæй… Святослав Афганистанмæ бахаудтæй, Советон Æфсади рæнгъитæмæ имæ ку фæдздзурдтонцæ, еци рæстæг.  Силгоймаги имисуйнæгтæмæ гæсгæ, уæд æ фурти цард еци цаути фæсте цæхгæрмæ раййивта.

Цитгин иуазгутæн мадзал исаразгутæ балæвар кодтонцæ номбæлдаргæ лæвæрттæ. Уой фæсте ба мадзали архайгутæ деденгутæ байвардтонцæ еугур рæстæгути Фидибæсти сæрбæлтау тохгæнгути мадтæлти кадæн циртдзæвæнбæл. Тугъдонтæ-интернационалисттæн зæрдиагæй райарфæ кодтонцæ Ирæфи райони Сæргълæууæги хуæдæййевæг Соскъити Алан, Хæзнидони гъæуи сæргълæууæг Гегкити Рамазан æма райони Нихæси сæрдар Гуæцæлти Агубе.