07 августа 2022

Ӕ КАРНИ РАЙДАЙӔН – Ӕ ХОРӔФСЕС ИСФӔЛДИСТАДӔ

08.07.2022 | 10:30

Дзæуæгигъæуи 9 июли æстдæс сахаттебæл сувæллæнтти театр «Сабий»-и рацæудзæнæй Плити Николи поэтикон концерт. Уордæмæ бацæун æнгъездзæнæй «Пушкинская карта» ке хонунцæ, уой бавдесгæй.

Николи мадæ – Плити Зæлинæ куд радзурдта, уотемæй æвзонг поэтессæ рагæй бæлдтæй Дзæуæгигъæуи концерт исаразунмæ.

– Концерт уодзæнæй, æмдзæвгитæй арæзт æ уарзон поэти портрет. Николь бакæсдзæнæй Пушкини, Лермонтови, Блоки, Ахматовай, Цветаевай, Рождественскийи, уæдта ма, ке зæгъун æй гъæуй, æ уарзон поэт И. Бродскийи æмдзæвгитæ. Бакæсдзæнæй ма нуриккон поэтти æмдзæвгитæ дæр. Николь ма базонгæ кæндзæнæй концертмæ кæсгути поэтти цардвæндæгти цæмæдесагдæр цаути хæццæ. Уомæй уæлдай ма бакæсдзæнæй æхе æмдзæвгитæ дæр. Аци бæнтти гъæуама рацæуа е ’ртиккаг киунугæ «Я научусь верить». Нæ зæрдæ дардзинан, типографий ’рдигæй кæд неци къулумпидзийнæдтæ æрцæуа, уæд адæм киунугæ фæууиндзæнæнцæ концерти бони. Еузагъдæй, Дзæуæгигъæуи рацæудзæнæй агъазиау эксклюзивон, поэтикон концерт, – радзурдта Плити Зæлинæ.

Мæйи размæ Мæскуй Сурх фæзи рацудæй Николь Плиевай цуппæрæймаг сольный концерт. Уоми е бакастæй поэттæ-юбилярти æмдзæвгитæ.

Куд ма нин фегъосун кодтонцæ, уотемæй Николь берæ хæттити рамулдта Уæрæсей Кубок горæттаг æма æхсæнадæмон конкурсти æмдзæвгитæ кæсгути ’хсæн. Ахид æй фæххонунцæ «нæ бæсти сæйраг æмдзæвгитæ кæсæг».

Æртæ поэтикон æмбурдгондей автор, театр æма киной актрисæ, телеуинунадамонæг æма Мæскуй финсгути Цæдеси иуонг Плити Никольбæл цæуй еуæндæс анзи. Æхсæз анзи ибæл ку цудæй, уæдæй райдæдта æмдзæвгитæ финсун.