Хамид САВКУЕВИ конд хузæ.

Нæ рагфидтæлтæ сæ дзамани уоййасæбæл тухгин æма æнæбасæттон адтæнцæ, æма син сæ нихмæ некæци тухгæнæг тухæ нæ ирдта.  Уæд дин еууæхæни бабæй сæмæ кæцидæр знаг нимпурста. Æма ин нæ рагфидтæлтæ бæрзæйсæттæн цæф ку никкодтонцæ, уæд федаунмæ фæцæй. Æрбарвиста федаугути.

– Мах дес кæнæн уæ нифс æма хъаурæбæл! – загътонцæ нæ рагфидтæлти хестæртæн, сæ бафедауни гъуддаг арæзт ку ’рцудæй, уæд.

– Кæцæй уæмæ цæуй уой бæрцæ нифс æма хъаурæ? Фæттасун ку нæ кометæ.

– Нæ паддзах ни уотæ домуй, – адтæй сæ дзуапп.

– Æма æ хæццæ фембæлун, радзубанди кæнун æнгъезуй?

– Нуртæккæ фунæй кæнуй. Ку райгъал уа, уæд, бæргæ, фал дзоргæ нæ кæнуй.

– Уинун нин æй уæддæр фæккæнетæ, – ниллæудтæнцæ федаугутæ.

– Хуарз, – загътонцæ фусунтæ æма цæйбæрцæдæр рæстæги фæсте еу силгоймагæн рахæссун кодтонцæ æ нæуæгигурд биццеуи.

– Е æй нæ паддзах. Уой исонибонбæл гъуди кæнгæй ан æнæбасæттон, нифсгун. Е ни домуй æхе æма æ зæнхæ гъæуай кæнун…

Аци рагфидтæлтиккон таурæхъæй хумæтæги нæ идайæн нæ Фидибæсти гъæуайгæнæги Бони фæдбæл нæ дзубанди.

Нæ фидтæлтæ ба фæлтæрæй-фæлтæрмæ тухгин æма æнæбасæттон уомæй адтæнцæ, æма сæ тохи сæр адтæй Фидибæсти сæрбæлтау æма уой исонибони – сæ кæстæрти хуæрзнивæн.

Уотæ адтæй æма уодзæнæй алкæддæр. Уомæн æвдесæн æй, мæнæ абони сæрмагонд æфсæддон операций архайгутæ куд æхсаргинæй æнхæст кæнунцæ се ’фсæддон ихæс нæ Фидибæсти сæрбæлтау. Уонæй еу – гвардий лейтенант Мæрзойти Аркадийи фурт Василий, тъасхæгæнæг взводи командир. Е ’фсæддон ихæс æнхæст кæнгæй, æхсаргинæй фæммард æй фарæ октябри. Æ алæмæти лæгдзийнади туххæй ин æрæги нæ бæсти Президент Владимир Путини Указæй аккагонд æрцудæй Уæрæсей Бæгъатæри ном… Гъулæггагæн, æ фæсмæрдæ.

… Абони нæ Фидибæсти гъæуайгæнæги Бони фæдбæл ба зæрдиагæй арфæ кæнæн, еци гъуддаги нæлгоймагæй-силгоймагæй кадæриддæр хъазауат кæнуй, уонæн сæ еугуремæн дæр, нæ Исфæлдесæгæй ба еунæг уой корæн, цæмæй нæ бæстæн ралæууонцæ сабур царди рæстæгутæ.