Зундгонд куд æй, уотемæй дууæ боней дæргъи, 10-11 сентябри рацудæнцæ æвзурститæ – æвзурст цудæнцæ нæ республики æвдæймаг фæдздзурди Парламенти депутаттæ, районти æма муниципалитетти депутаттæ, цалдæр рауæнеми ба гъæууон цæрæн рауæнти сæргълæугутæ. Куд исбæрæг æй, уотемæй си архайдтонцæ нæ республики æвзаргутæн сæ 69,9 проценти.

Центрон æвзарæн къамиси бæрæггæнæнтæмæ гæсгæ фулдæр гъæлæстæ æрæмбурд кодта политикон парти «Еугонд Уæрæсе» – 67,5 проценти, парти «Рæстаг Уæрæсе-Патриоттæ-Рæстдзийнади фарс» – 14,4 проценти,  Уæрæсей Федераций Коммунистон парти – 12,5, парти «Фидибæстæ» – 2,2  æма Либералон-демократон парти – 1,58 проценти. Уотемæй республики Парламенти уодзæнæнцæ æртæ политикон фракций. Уагæвæрдмæ гæсгæ æвзурститæй 15 боней фæсте гъæуама уа Парламентмæ равзурст депутатти фиццаг æмбурд.

Еузагъдæй, нæ республики дзиллæ æвзурстити рæстæг  сæ фæндæ  загътонцæ æма, се ‘ууæнкæй ке фæххайгин кодтонцæ, етæ ба нурæй фæстæмæ бæлвурд архайд æма гъуддæгутæй гъæуама  байархайуонцæ, цæмæй адæм ма фæффудевгед уонцæ æма си арази уонцæ…