Фæлтæрæй-фæлтæрмæ дæр нæмæ иуазæгуарзондзийнадæ цæйбæрцæбæл цитгийнаг æгъдау адтæй, уой ни ка нæ зонуй. Уогæ рæстæгутæ сæхе куд æййевгæ цæунцæ, уотæ еци æгъдау нуриккон цардарæзти фæткитæмæ гæсгæ цæмæйдæрти кæд æндæрхузон кæнуй, уæддæр æ медес ба еци еугæндзойнон æй – иуазæги исбоц кæнун нæмæ нерæнгæ дæр цитгин ихæсбæл нимад цæуй.

Нури доги ба еци æгъдау еугурпаддзахадон гъуддаг иссæй, æма имæ зингæ æргом æздæхт цæуй куд социалон-экономикон къабазæ, уотæ. Еумæйагæй хунд цæуй – туризм.

Уомæн æвдесæн, нæ республики Хецауади Сæрдар Дзанайти Барис ци æмбурд исаразта, е дæр. Дзубанди си цудæй туристон къабази райрæзти туххæй æнæмæнгæ райаразуйнаг фарстати фæдбæл. Æмбурди архайдтонцæ ахурадон уагæдæнтти разамонгутæ æма бизнеси минæвæрттæ. Республики ахурадæ æма науки министр Алибегти Эллæ, туризми комитети сæрдари ихæстæ рæстæгмæ æнхæстгæнæг Кочити Сослан, адæмæн куст дæттуни Комитети сæрдар Цъæхилти Чермен æма экономикон ирæзти фиццаг хуæдæййевæг Олег Быкадоров дзурдтонцæ, туристон къабази арæхстгинæй ка коса, уæхæн косæндæнттæ ке нæ фагæ кæнуй æма уой туххæй ке гъæуй ахурти системæ райаразун, туризми къабази ка архайуй, уонæн сæ фæлтæрддзийнадæ фæууæлдæр кæнуни къурситæ исаразун практикон ахурти хæццæ.

Дзанайти Барис, Цæгат Иристони Хецауади Сæрдар:

– Абони нæмæ туризми къабази райрæзти зингæ æнтæстдзийнæдтæ ке ес, е бæлвурд æй. Нæ Иристон гъæздуг æй æрдзон уавæртæй, рагон историон æвдесæнтæй, нæ адæми цæмæдесаг æгъдæуттæ æма фæткитæй, нæ зæрдхæлардзийнадæ æма иуазæгуарзондзийнадæй. Уомæн æвдесæн е æй, æма аци анз айдагъ фондз мæйей дæргъи нæ республикæ бабæрæг кодтонцæ 800 мин адæймаги. Е хуарз бæрæггæнæн æй. Æма нæ идарддæр дæр архайун гъæуй,  цæмæй нæмæ туризми индустри цардгъондæр кæна, цæмæй Цæгат Иристони хуарзи кой игъуса æнæгъæнæ Уæрæсей дæр æма фæсарæнти дæр.

 

Куд фæббæрæг кодтонцæ, уотемæй астæуккаг ахуради авд æма инсæй уагæдонемæй дæс цæттæ кæнунцæ специалисттæ программæ «Туризм æма иуазæгуарзондзийнадæ»-мæ гæсгæ. 2024-2025 ахури анзмæ уоми еумæ райсгæй ес 580 бунати – фари хæццæ рабаргæй, 50 фулдæр æма дууæ хатти фулдæр – 2021 анзи хæццæ рабаргæй. Уомæй уæлдай ма аци анз Дзæуæгигъæуи политехникон техникум хаст æрцудæй 2025 анзи федералон бюджетæй паддзахадон агъаз лæвæрд кæмæн æрцæудзæнæй субсидити хузи федералон проект «Профессионалитет»-и фæлгæти, еци конкурси 15 уæлахездзауей хигъдмæ. Гранти фæрæзнити фæрци арæзт æрцæудзæнæй ахурадон кластер туризм æма лæггæдти къабази агъазæн æма байеу кæндзæнæй астæуккаг профилон профессионалон ахурадон уагæдæнттæ. Е ба ратдзæнæй фадуат гъæугæ дæсниæдтæбæл специалисттæ цæттæ кæнунæн. Паддзахадон агъазæй дæс æма æртинсæй миллион соми, сæ фæрци материалон-техникон базæ, ахурадон æма кустадон инфраструктурæ нуриккон уагæбæл райараздзæнæнцæ.

Премьер-министр куд фæббæрæг кодта, уотемæй бæрзонддæр æмвæзадæмæ кæсун гъæуй, аттестацигонд ка не ’рцæудзæнæй, уæхæн надамонгутæ (гидтæ) цæттæ кæнуни куст. Республики аразунцæ нæуæг объекттæ, гъæудзæнæй фулдæр специалисттæ туристон къабази. Дзанайти Барис баханхæ кодта, еци гъуддагбæл гъæуама æмвæндæ æма æмхъаурæй ке архайуонцæ профилон оргæнтæ, æнхæстгæнæг хецауадæ æма бизнеси минæвæрттæ.

Туристон къабази минæвæрттæ загътонцæ, фулдæр ке гъæуй хуæруйнаггæнгутæ, официанттæ, аттестацигонд гидтæ, администратортæ.

Хецауади Сæрдар туризми Комитетæн байхæс кодта ахурадæ æма науки Министрадæ æма адæмæн куст дæттуни Комитетæн туристон къабази инвестортæ æма кустдæтгути домæнтæн гъæугæ специалистти фæлтæрддзийнадæ фæббæрзонддæр кæнун æма кадртæ нæуæгæй бацæттæ кæнуни туххæй. Уæхæн куст бакæнун гъæуй гъæууон хæдзаради министради хæццæ дæр проект «Агротуризм»-мæ гæсгæ.