Лескейнæгтæй литературон исфæлдистади æнтæстгинæй ка фескъуæлхтæй, уонæй еу адтæй Цъеути Замæдин дæр – поэт æма прозаик. Æ райгурæн Лескенбæл æновуд ке адтæй, зæрдтагон уарзтæй æй ке уарзта, е æ исфæлдистади дæр зиннуй бæлвурдæй. Æма ин уой фæдбæл финст уадзимистæй еуей абони мухур кæнæн.

ЛЕСКЕНИ ЗАР

Дæуæн кæнун мæ зар,

Мæ аргъау, мæ гъар фунтæ,

Мæ деденæг гъæубæстæ,

Кустуарзон Лескен.

Дæ медзилди бæрзæндтæ,

Тар гъæдтæ, рæзбунтæ,

Дзæнгъа сауæдæнтæ

Æнæзонгæ неке ’й.

Базард:

Фæрсаг мин, мæ лимæнтæ, фæрсаг!

Дзæгъæл лæуд маке кæнæд фæрсæй,

Мах æхсæн некæмæн ни ’й еске

Нæ устур зæрдинцойнæ Лескен.

Кæмидæр уон, уæддæр

Дæу агоруй мæ цæстæ,

Дæ федауцæ гъæунгти

Сагъæсти зелун:

Дæ фæрнгин дзилли ’хсæн,

Мæ тæнзæрдæ гъæубæстæ,

Бæдолау уарзойнади

Табедзæ ерун.

Базард:

Фæрсаг мин, мæ гъæугкæгтæ, фæрсаг!

Дзæгъæл лæуд маке кæнæд фæрсæй,

Мах æхсæн некæмæн ни ’й еске

Нæ фæлмæн мади хузæн Лескен.

Дæ сахъ фурттæ дæуæй

Зæрдизол некæд æнцæ,

Багъæуаги дæмæ

Балæуунцæ æнгон.

Етæ дæр дæу хузæн

Цард уарзæнттæ фæцæнцæ

Æма дин сæрбæрзондæй

Хæссунцæ дæ ном.

Базард:

Фæрсаг мин, нæ хуарз адæм, фæрсаг!

Дзæгъæл лæуд маке кæнæд фæрсæй,

Мах æхсæн некæмæн ни ’й еске

Нæ рæсугъд цардаразæг Лескен.

Дæуæн кæнун мæ зар,

Мæ аргъау, мæ гъар фунтæ,

Мæ деденæг гъæубæстæ,

Ме ’рæзгæ – Лескен.

Дæ медзилди бæрзæндтæ,

Тар гъæдтæ, рæзбунтæ,

Дзæнгъа сауæдæнттæ

Æнимисгæ неке ’й.

Базард:

Фæрсаг мин, уæ еугур дæр, фæрсаг!

Дзæгъæл лæуд маке кæнæд фæрсæй,

Мах æхсæн некæмæн ни ’й еске

Нæ кæдзос, сугъзæрийнæ Лескен.