Зундгонд куд æй, уотемæй аци анз Уæрæсей нимад цæуй бийнонти Анзбæл. Уомæ гæсгæ нæмæ арæзт цæуй бийнонти цитгинæнæг берæ аллихузон мадзæлттæ. Уонæй еу иссæй еума æхцæуæн хабар – Уæрæсей Федераций Президент Владимир Путин æрæги нæ бæсти Хецауадæн бафæдзахста, цæмæй аци анзи 1 декабри уæнгæ бакосонцæ берæсувæллонгин бийнонтæн æхцайæй аллианзон агъазкæнуйнади фарстабæл æма æнхæстгонд цæуа бийнонти, уарзондзийнади æма еузæрдиуондзийнади Бонмæ (аци бæрæгбон Уæрæсей 2008 анзæй фæстæмæ алли анз дæр бæрæггонд цæуй 8 июли). Аци нæуæгдзийнади фæдбæл фæндæ фæззиндтæй, «Это у нас семейное», зæгъгæ, Еугуруæрæсеуон конкурси кæронбæттæнмæ рацæуæг бийнонти хæццæ Владимир Путини фембæлди рæстæг дзубандимæ гæсгæ.

Гъуддаг исаразун ихæсгонд æй нæ бæсти Хецауадæн, уой Сæрдар Михаил Мишустин ибæл æй комкоммæ дзуапдæттæг. Ци æма куд арæзт æрцæудзæнæй, уой фæдбæл гъæуама игъустгонд æрцæуа нæ бæсти Президентæн аци анз 1 декабри.

* * *

Нур ба уин ракæнуйнаг ан, нæ республики бийнонтæбæл ауодундзийнади нисанеуæгæй ци мадзæлттæ арæзт цæуй, уой фæдбæл хабæрттæ.

Æртæ анземæй кæстæр сувæллæнттæ кæми цæрунцæ, астсæдæ уæхæн цæгатиристойнаг бийнонтæ ниййерæги капитали фæрæзнитæй феддонтæ есунцæ. Анзи райдайæнæй нурмæ Уæрæсей Социалон фонди цæгатиристойнаг хайадæ социалон агъази амунд хузæн радех кодта 78 миллион соми. Уой фæдбæл хайади разамонæг Тæболти Сергей уотæ зæгъуй:

– Региони еу адæймагæн цæрунæн гъæугæ тæккæ минкъийдæр хæрзти дууæхаттон бæрцæй дæлдæр рæстæмбес æфтуйаги хæццæ (гъома, ниййерæги фæллойнадон архайдмæ, кенæ есбонмæ æнæ уæлæнхасæн домæнтæй мæйæмæ адæймагæн 27 816 соми) бийнонтæн феддон исæвæрунцæ. Аци анз ниййерæги капитали фæрæзнитæй аллимæйон феддони бæрцæ æй нæ республики сувæллонæн фæццæрунæн гъæугæ тæккæ минкъийдæр хæрзти бæрцæ, гъома, 13 941 соми.

Уæ зæрдæбæл уин лæуун кæнæн: фарæй фæстæмæ бийнонтæн ес æртæ анземæй кæстæр алли сувæллонæн дæр ниййерæги капиталæй аллимæйон феддонæн гæгъæдитæ исаразуни барæ (уой размæ ба амунд гæгъæдитæ аразтонцæ айдагъдæр дуккаг сувæллонæн). Бийнонтæ сувæллони райгурди мæйæй фæстæмæ феддон цæмæй есонцæ, уой туххæй сæ гъæуй нæуæг сабийи райгурди мæйæй  анзи æрдæги æмгъудмæ курдиадæ барветун.

Бийнонтæн сæ бон æй аллимæйон феддон есуни фæдбæл курдиадæ портал «Госуслуги»-йи, кенæ бæсти Социалон фонди цæгатиристойнаг хайади клиентон службити, кенæдта берæкъабазгин центри комкоммæ уагæй барветун. Ахид мади ихæс фæууй айдагъдæр курдиадæ барветун, Социалон фонди специалисттæ ба еугур гъæугæ бæрæггæнæнтæ райсдзæнæнцæ хуæдбарæй, ведомствити æмгустади фæткæмæ гæсгæ.

Феддони туххæй курдиадæмæ каст æрцæуй дæс косгæ боней æмгъудмæ. Аразий дзуапп раттуни фæсте бийнонтæн æхца барветунцæ фондз косгæ боней æмгъудмæ, фæстæдæр ба – феддон исæвæруни мæйи фæсте цæуæг мæйи фæндзæймаг бони. Феддони бон кæд фæлладуадзæн бонмæ, кенæ бæрæгбонмæ хауй, уæд æхца бафедунцæ бон раздæр.

Аллимæйон феддон исæвæрунцæ дууадæс мæйей æмгъудмæ. Феддон ци мæйæн исæвардтонцæ, мадæн ес æмгъуди еци фæстаг мæйæ феддон райсуни туххæй дуккаг курдиадæ барветуни барæ (сабийбæл цалинмæ æртæ анзи исæнхæст уа, уæдмæ).

Уæрæсей Социалон фонди еумæйаг контакт-центрмæ бадзорæн ес телефонæй: 8-800-100-00-01 (телефонæй  бадзорæн ес лæвар). Уæрæсей Социалон фонди цæгатиристойнаг хайади линий кусти фæткæ: авдисæрæй цуппæрæнмæ – 8 сахатти æма 30 минуттемæй ба 17 сахатти æма 30 минуттей уæнгæ, майрæнбони ба – 8 сахатти æма 30 минуттемæй ба 16 сахатти æма 30 минуттей уæнгæ.

Уæрæсей Федераций Социалон фонди цæгатиристойнаг хайади пресс-службæ