Сæрмагонд æфсæддон операций архайгæй, цæгатиристойнаг тугъдон Александр Данилов æхсаргинæй ке фескъуæлхтæй, уой туххæй ин аккаггонд æрцæудзæнæй Уæрæсей Бæгъатæри кадгин ном. Уой туххæй фегъосун кодта Уæрæсей Президент Владимир Путин, æрæги не ’мзæнхон бæгъатæри, е æ цæфтæй æхе ци госпитæли дзæбæх кæнуй, уоми ’й ку бабæрæг кодта, уæд сæмæ ци зæрдиаг дзубанди рауадæй, уой рæстæги.

Мæскуй уæлдæр æфсæддон командон училищей рауагъдон, дæлболкъон Александр Данилов разамунд лæвардта не ’фсæддони батальонæн, Курски облæсти поселок Малая Локня украинаг æфсæдтæй гъæуайгæнгæй.

Еци карз тохи рæстæг Александри батальон ниппурхæ кодта знаги аст тъасхæгæнæг къуари, фестæгæфсæддонтæ ласæг  аст хуæдтолги, 15 хуæдтолгæ «Хаммер»-и, уацари райста еу украинаг æфсæддони. Кæцидæр усми не ’фсæддонтæ уæззау уавæри бахаудтæнцæ, знæгтæ сæбæл æрхъола ’нцæ, уотемæй тохæнгарз нæбал фагæ кодта нæхеуонтæмæ, цæмæй, сæхуæдтæ кæми ’нцæ, уордæмæ знæгти цæвонцæ дзармадзантæй, кæд æма æхецæн дæр æма е ’мбæлттæн дæр хъæбæр тæссаг адтæй фæммард унæй,  уæддæр.

Афицер ку фæццæф æй, уæддæр нæ ниууагъта æ бунат, рамбурд кодта е ’фсæддонти, цæфти, уонæбæл ма бафтудæнцæ бунæттон цæргутæй еу-дæс æма инсæй адæймаги, æма сæ уотемæй æдас рауæнмæ ракодта.

Александр Даниловæн æ алæмæти лæгдзийнадæн никки аккаг аргъгонд цæуй, – куд загътан, уотемæй ин нæ бæсти разамонæг Владимир Путини фæндæй лæвæрд æрцæудзæнæй Уæрæсей Бæгъатæри ном, æрвист æрцæудзæнæй идарддæр ахур кæнунмæ Уæрæсейаг Гæрзефтонг тухти Генералон штаби Академимæ.