Не ’мзæнхон искурдиадæгин зартæгæнæг Тайсаути Владимир зундгонд æй æнæгъæнæ Уæрæсей музыкалон аййевадæбæл æновуд дзиллæн. Æ рæстæги æнтæстгинæй каст фæцæй Мæскуй Паддзахадон театралон аййевади А.В. Луначарскийи номбæл институти музыкалон факультет. Цалдæр анзей дæргъи (1988-1994) æнзти адтæй Цæгат Иристони музыкалон театри солист. Уой сценæбæл зардта: Фигаро – «Фигарой киндзæхсæвæр»-и, Къарол Реней «Иоланта»-йи,  Самюэл «Бал-Маскарад»-и, зæронд цигайнаг «Алеко»-й, къниаз Франческу «Граф Люксембург»-и, Анджелотти «Тоска»-йи, Наиб – «Фатимæ»-йи, Бесол, Фарнæ – «Зæхх сиды» – Цорионти Р., Хъубади – «Къоста»-й æма спектакльти.

Тайсауи-фурти архайд сæ зæрдæбæл хуарз бадардтонцæ æригон театрдзаутæ дæр. Архайдта «Буратини хабæрттæ», «Золушка», «Тикис Леопольди райгурæн бон» æма æндæр спектакльти.

Дзæуæгигъæуи косгæй ма разæнгардæй архайдта, Гæздæнти Болат разамунд ци адæмон оркестрæн лæвардта, уой хæццæ дæр.

Тайсаути Владимир 1994 анзæй фæстæмæ косуй Перми оперæ æма балети академий театри раздзæуæг зартæгæнæгæй (бас). Заруй еугур репертуарон музыкалон уадзимистæй еугуреми дæр.

Нур ба Цæгат Иристони цæргутæн дæр ес равгæ нæ искурдиадæгин зартæгæнæги аййевади хæццæ базонгæ уни равгæ – Тайсаути Владимири концерт арæзт æрцæудзæнæй Дзæуæгигъæуи Вахтангови Хæдзарæ-музейи 2 октябри. Райдайдзæнæй изæри 19 сахаттебæл.

Концерт рахæсдзæнæй еу сахат æма дууинсæй минути.