Аци анз нæ дзиллæн уæлдай цитгийнаг æй цалдæр ахсгиаг цауемæ гæсгæ – 250 анзи исæнхæст æй Иристон Уæрæсей хæццæ байеу унбæл, 240 анзи исæнхæст æй нæ республики сæйраг сахар Дзæуæгигъæубæл, 100 анзи исæнхæст æй Цæгат Иристони автономибæл, 165 анзи исæнхæст уодзæнæй нæ национ аййевадон литератури бундорæвæргутæй еу, Хетæгкати Къостай райгурдбæл (1859-1906). Аци еугур цаутæ нæхемæ цитгингонд æрцудæнцæ æма ма цæудзæнæнцæ. Уой хæццæ ба ма – сауæнгæ Мæскуй дæр. Ами 8-15 октябри рацæудзæнæнцæ Цæгат Иристони культури бæнттæ. Ци мадзæлттæ си гъæуама арæзт æрцæуа, уой туххæй игъосункæнуйнаг ба кæсетæ 2-аг фарсбæл.

Рæхги, 8-15 октябри Мæскуй арæзт æрцæудзæнæй Цæгат Иристони культурæн ци дæсбонон арæзт æрцæудзæнæй, уонæми нæ республики цæргутæй дзиллонæй архайуни равгæ кæд нæ фæууодзæнæй, уæддæр берети ба фæндуй зонун, цитæ си арæзт æрцæудзæнæй, уой. Æма уин еци хабæртти кой цубурæй ракæндзинан.

7-9 октябри Уæрæсей Федераций Федералон Совети азгъунсти арæзт æрцæудзæнæй Цæгат Иристони социалон-экономикон æнтæстити æма культури равдист.

9 октябри Мæскуй концертон зал «Зарядье»-й арæзт æрцæудзæнæй Паддзахадон Академий Мариинаг театри симфонион оркестри концерт не ’мзæнхон номдзуд дирижер Гергити Валерийи разамундæй.

10 октябри Евгений Вахтангови номбæл Паддзахадон академион театри азгъунсти Цæгат Иристони Тæбæхсæути Балой номбæл паддзахадон академион театри артисттæ равдесдзæнæнцæ Кокайти Тотрази финст пьесæмæ гæсгæ арæзт спектакль «Гæздæнтæ».

11 октябри Цæгат Иристони Евгений Вахтангови номбæл Паддзахадон академион Фæллойнадон Сурх Турусай орденхæссæг уруссаг драмон театри артисттæ равдесдзæнæнцæ мæскуйæгтæн Еленæ Исаевай пьесæмæ гæсгæ арæзт спектакль «Женщины Есенина». Æвдист цæудзæнæй Мæскуй Евгений Вахтангови номбæл Паддзахадон академион театри азгъунсти.

11-13 октябри нæ бæсти сæйраг сахари цæргутæй æма æ иуазгутæй алке бон дæр уодзæнæй Мæскуй фæлладуадзæн  дзæхæрадонæ «Эрмитаж»-и ирон къеретæ æма хуæруйнæгтæй исахуадун. Уой хæццæ ба ма син уодзæнæй равгæ уоми декоративон-æнхæстгæнæн аййевади  исфæлдистади равдист-базари сæхецæн зæрдæмæдзæугæ дзаумæуттæ балхæнун, уæдта концертмæ бакæсун.

12 октябри Мæскуй 1941-1945 æнзти Устур Фидибæстон тугъди Центрон музейи рацæудзæнæй Цæгат Иристони Паддзахадон филармоний исфæлдистадон коллективти Тугъдон-патриотон концерт, Иристон Уæрæсей хæццæ байеунбæл 250 анзи ке исæнхæст æй, уой кадæн.

13 октябри Мæскуй рауæнтæй еуеми, Кулишкити, Аланское подворье ке хонунцæ, уоми Сугъдæг Мадæ Майрæни аргъауæндони  арæзт æрцæудзæнæй хуцаубони аргъауни сæрмагонд мадзал.

Балет «Фатимæ»

13 октябри Уæрæсей Паддзахадон академион Устур театри азгъунсти Паддзахадон академион Мариинаг театри дзæуæгигъæуккаг филиали исфæлдистадон коллектив равдесдзæнæй балет «Фатимæ».

14 октябри  Цæгат Иристони камерон зартæгæнгути къуар «Алани» равдесдзæнæй сæрмагонд концертон программæ Мæскуй æхсæнадæмон музыки хæдзари.

14-24 октябри Уæрæсейаг аййевæдти академий арæзт æрцæудзæнæй, Цæгат Иристонæй аци зундгонд ахургæнæндонæ каст ка фæцæй, уони исфæлдистадон кустити равдист.

Цæгат Иристони культури дæсбононæн кæронбæттæн исуодзæнæй агъазиау концертон программæ, кæци 15октябри æвдист цæудзæнæй Уæрæсей Паддзахадон академион Устур театри сценæбæл. Архайдзæнæнцæ си Цæгат Иристони аййевæдти æскъуæлхтдæр минæвæрттæ æма Уæрæсей Федераций культури номдзуддæр архайгутæ.