Зундгонд куд æй, уотемæй аци анз нæ республикæ бæрæг кæнуй цалдæр вазуггин историон цауи: Иристон Уæрæсей байеу уни 250 анзи, Дзæуæгигъæу 240 анзи æма Цæгат Иристони автономий 100 анзи. Еци цаути кадæн анзи дæргъи берæ цæмæдесаг æма дзиллон мадзæлттæ арæзт æрцудæй æма ма цæудзæнæй нæхемæ. Аци бæрæгбæнтти кадæн Мæскуй дæр 7 октябри райдæдтонцæ Цæгат Иристони Бæнттæ.

Нæ республики Сæргълæууæг Сергей Меняйло æма Парламенти Сæрдар Тускъати Таймораз радзубанди кодтонцæ Федераций Совети æмбурди «Субъекти сахат»-и фæлгæти. Мадзал арæзт æрцудæй Цæгат Иристони презентаций рæстæг, цæмæй сенаторти базонгæ кæнонцæ региони сæйрагдæр социалон-экономикон къабæзти ирæзти хæццæ, уæдта федералон центри агъаз кæми гъæуй, еци фарстати хæццæ.

Мадзал байгон кæнгæй, Федераций Совети Сæрдар Валентинæ Матвиенко региони цæргутæн арфæ ракодта Цæгат Иристони автономий 100 анзей, Дзæуæгигъæуи 240 анзи æма Иристони Уæрæсей хæццæ байеу 250 анзи юбилейти фæдбæл.

Валентинæ Матвиенко æ радзубандий баханхæ кодта уой дæр, æма Цæгат Иристон Уæрæсей Федераций уникалон субъект ке æй, бæсти берæнацион регионтæй еу, хуæдхуз культурæ, рагон хуæрзведауцæ æгъдæутти æма гъæздуг историй хæццæ.

Федераций Совети æмбурди радзубанди кæнгæй Сергей Меняйло æма Тускъати Таймораз бæлвурд дæнцитæ ’рхастонцæ нæ республики абони цардиуагæ зæрдæмæдзæугæ хузи аразуни фæдбæл архайди æма исонибонмæ нисанти туххæй.

Гъæздуг æма цæмæдесаг æнцæ, Мæскуй Цæгат Иристони Бæнтти ци культурон мадзæлттæ æнхæстгонд æрцæудзæнæнцæ, етæ дæр. Уонæн сæ кæронбæттæн ба исуодзæнæй Цæгат Ирситони аййевæдти архайгути устур концерт. Е уодзæнæй 15 октябри Уæрæсей Устур театри историон сценæбæл.