Уæрæсей Федераций Паддзахадон Думи пленарон æмбурди, «Хецауадон сахат», зæгъгæ, мадзали фæлгæти ци пленарон æмбурд арæзт æрцудæй, уоми берæвæрсуг дзубанди рауадæй нæ бæсти цæрæнуатон-коммуналон комплекси инфраструктури абони уавæр фæххуæздæр кæнуни туххæй исаразуйнаг фарстати фæдбæл. Æмбурдæн разамунд лæвардта Паддзахадон Думи сæрдар Вячеслав Володин.

Сæ сæргъи Цæгат Иристони Сæргълæууæг Сергей Меняйло, уотемæй аци æмбурди архайдтонцæ нæ республики минæвæрттæ дæр: цæрæнуатон-коммуналон хæдзаради, артаг æма энергетики регионалон министради бæрнон косгутæ.

Хецаудзийнади закъонæвæрæг æма æнхæстгæнæг федералон æма регионалон оргæнти минæвæрттæ бæлвурдæй æрдзубанди кодтонцæ коммуналон инфраструктури объектти зуймон уавæрти архайунмæ цæттæдзийнадæбæл, цæрæнуатон лæггæдти къабази æргъти политикæ, донуадзæн, гъардæттæн æма иннæ хизæгти цалцæг æма æндæр уæхæн ахсгиаг фарстатæбæл.

Сергей Меняйло æ радзубандий Паддзахадон Думи разамундæн балæдæрун кодта, цæрæнуатон-коммуналон хæдзаради комплекси куст фæййахедгæдæр кæнунæн Цæгат Иристони циуавæр ахедгæ инвестицион проекттæ исаразун багъæудзæнæй, уой туххæй фæндитæ.

Фæстæдæр Цæгат Иристони разамонæгæн сæрмагонд фембæлд адтæй Паддзахадон Думи арæзтадæ æма цæрæнуатон-коммуналон хæдзаради фарстати фæдбæл Комитети сæрдар Сергей Пахомови хæццæ. Дзубанди си цудæй республики цæрæнуатон-коммуналон хæдзаради лухкæнуйнаг фарстатæбæл, региони артаги-энергетики комплекси райрæзти проектбæл.

Фембæлди рæстæг Сергей Меняйло фегъосун кодта æ фæндæ: бæргæ хуарз уидæ æма Комитети иуонгтæ Цæгат Иристон ку бабæрæг кæниуонцæ, цæмæй ами бæлвурддæр каст æрцæуа къабази уавæртæмæ æма исбæлвурд кæнонцæ, æ фæххузæнондæр кæнуни туххæй ци исаразун гъæуй, уой.