Горæтгæрон райони Тарскæйи гъæуи фиццаг скъолай кадгин уавæри байгон кодтонцæ Тугъдон намус æма сæрмагонд æфсæддон операций архайгути музейтæ.

Аци ахсгиаг гъæугæ гъуддаг цæмæй исирæзтайдæ, уомæн ахурадон уагæдони коллективæн устур агъаз бакодтонцæ Фæммардуæвæг Фидибæстæ гъæуайгæнгути бийнонти еугуруæрæсеуон æхсæнадон организаций цæгатиристойнаг дæлхайади сæргълæууæг Татьянæ Днепровская, Уæрæсей Медгъуддæгути министради Цæгат Кавкази федералон зилди Паддзахадон управлений сæргълæууæг, инæлар-болкъон Сергей Бачурин æма аци ведомстви пресс-секретарь Дойати Иринæ, Цæгат Иристони медгъуддæгути министр Демьян Лаптев, æхсæнадон организаци «Терки хъазахъи культурон центр»-и сæргълæууæг Владимир Писаренко æма рекламон агентадæ «Зебра-мастер».

Ахургæнгутæ æма скъоладзаутæ устур куст бакодтонцæ, æрæмбурд кодтонцæ гъæздуг æрмæг. Фæууинæн си ес, гъæуæй Устур Фидибæстон тугъди ка архайдта, еци тугъдонти хузистити агъазиау стенд, сæрмагонд æфсæддон операций ка фæммард æй, еци тугъдонти хузиститæ, дарæс, хуæрзеугутæ, ци лæгдзийнадæ равдистонцæ тохи будури, уой æвдесæнтæ. Зæрдиагæй байархайдтонцæ, исаразтонцæ зæрдæмæгъаргæ экспозицитæ. Музейтæ байгон кæнуни кадгин мадзалмæ ’рбахудтонцæ, абони скъолай рауагъдонтæй Украини зæнхæбæл хъазауатон тох ка кæнуй, уæдта æ цард тугъди будури ци æригон лæхъуæнтæн раскъудæй, еци бæгъатæрти бийнонти, гъæуи цæргути, райони хецауадæ æма æхсæнадон организацити минæвæртти.

Берæ адæм æрбацудæй еци бон Тарскæйи скъоламæ. Иуазгутæ базонгæ ’нцæ музейти æрмæгути хæццæ. Нур алли адæймагæн дæр фадуат уодзæнæй ардæмæ ’рбацæунæн. Тохи будури ка фæммард æй, еци лæхъуæнти нæмттæ исæносон кодтонцæ, цæрдзæнæнцæ гъæуи цæргути зæрдити.