Хуæрзæрæги сахар Красноярски арæзт æрцудæй номдзуд богал Иван Ярыгини номбæл Кубок рамолуни дуйнеуон еристæ уæгъдебарæ гъæбесæйхуæстæй. Архайдтонцæ си æвддæс бæстей минæвæрттæ. Уомæ гæсгæ, уæлдай æхцæуæн æй, не ’мзæнхон богалтæ си хъæбæр æнтæстгинæй ке фескъуæлхтæнцæ – рамулдтонцæ си æхсæз хуæрзеуæги: сугъзæрийнæ майдантæй фæххайгин æнцæ 70 кг уæзи Байати Давид, 86 кг – Найфонти Артур, 74 кг – Сидахъати Заурбег. Æвзестæ майдан рамулдта 86 кг уæзи Багати Арслан, бронзæ майдантæй ба хуарзæнхгин иссæнцæ: 92 кг – Багати Алан, 97 кг – Таугазти Ирбег.

Аци хабар ма уæлдай æхцæуæн æй уомæй дæр, æма нæ нури богалтæ гъеуотæ æнтæстгинæй бæрзонддæр кæнунцæ, нæ Иристони уæгъдебарæй гъæбесæй хуæцуни аййевадæн федар бундор ка ниввардта, уони намус. Уонæй ба еу адтæй Дзарасати Дзабой фурт Саукуй. Сæрмагондæй ба ’й уомæ гæсгæ имисæн, æма 5 январи æ райгурдбæл исæнхæсти æй финддæс æма цуппаринсæй анзи (1930-1990).