Аци анз нæ дзиллæн уæлдай цитгийнаг æй – цуппаринсæй анзи æнхæст кæнуй нæ Цитгин Уæлахезбæл. Аци цау цæйбæрцæбæл ахсгиаг æй, уомæн бæлвурд æвдесæн æй е дæр, æма 2025 анз Уæрæсей Президент Владимир Путини сæрмагонд унаффæй нимад цæуй Фидибæстæ гъæуайгæнæги Анзбæл.

Цитгин Уæлахези бæрæгбон кадгинæй исбæрæг кæнуни нисанеуæгæй, куд нæ бæсти еугур рауæнти дæр, уотæ Цæгат Иристони дæр арæзт æрцудæй æма архайуй организацион комитет «Уæлахез». Рæстæгæй-рæстæгмæ арæзт æрцæунцæ æмбурдтæ, æрдзубанди си кæнунцæ, нерæнгæ арæзт ци ’рцудæй æма ма идарддæр дæр æнæмæнгæ ци гъуддæгутæ исæнхæст кæнуйнаг æнцæ, уонæбæл.

Æрæги бабæй адтæй комитети кезуй æмбурд. Разамунд ин лæвардта нæ республики Сæргълæууæг Сергей Меняйло. Æма æ радзубандий куд фæббæрæг кодта, уотемæй Устур Фидибæстон тугъди уæлахези 80 анзи бæрæгбони, Фидибæстæ гъæуайгæнæги Анзи кадæн зæрдæбæлдаруйнаг гъуддæгути ахедундзийнадæ агъазиау æй, æма сæ исæнхæст кæнунбæл уæлдай æновудæй байархайун гъæуй. Æ загъдмæ гæсгæ Уæлахези 80 анзей кадæн цитгингæнæн мадзæлттæбæл архайд нуриуæнгæ цæуй, хæстæгдæр рæстæги ба бæлвурдгонд æрцæудзæнæй юбилейон æмбурдтæ æма акцити номхигъд.

Уæлахези бони кадæн республики ци мадзæлттæ арæзт æрцæудзæнæй, уой туххæй радзубанди кодта Цæгат Иристони Хецауади Сæрдари хуæдæййевæг Плати Альбинæ. Куд фегъосун кодта, уотемæй бæрæгбони кадæн æмбурдтæ æма æндæр дзиллон акцитæ арæзт цæудзæнæнцæ анзи дæргъи дæр. Алли министрадтæ æма ведомствити фæндæй пъланмæ хаст æрцудæнцæ кадгин, номерæн-саударæн, зонадон-рохситауæн æма берæ æндæр уæхæн мадзæлттæ. Республики цæргутæ архайдзæнæнцæ, куд регионалон, уотæ еугуруæрæсеуон акцити дæр. Бæрæгбони пъланмæ хаст æрцудæнцæ 150 аллихузон дзиллон мадзали æма акций.

Æфсæддон парад, акцитæ «Æнæмæлгæ полк», «Сæ цæсгæнттæмæ син бакæсæ», «Геуæргийи лентъæ», «Уæлахези нæдтæ» æма «Намуси вахтæ», равдиститæ, зонадон æма литературон конференцитæ, тугъдон зарти конкурстæ, Лæгдзийнади уроктæ, æфсæддон-спортивон гъæзтитæ «Уæлахез» æма «Зарница» – аци æма иннæ цæмæдесаг акцитæбæл нуртæккæ косунцæ профилон ведомствити минæвæрттæ.

Сæрмагонд æргом æздæхт æрцæудзæнæй Устур Фæдибæстон тугъди бæгъатæрти номерæн циртдзæвæнтæ æма æдзард тугъдонти Æнсувæрон циртити уавæрмæ – уонæми еумæйаг хъауритæй базелдзæнæнцæ бунæттон хеунаффæйади оргæнтæ, фæсевæди гъуддæгути фæдбæл Комитет æма бархеуонти еугæндтæ. Уæхæн фæтки бундорбæл бæлвурд ихæстæ бакодтонцæ ахурадæ æма наукити, культури министрадти, мухур æма дзиллон коммуникцити гъуддæгути фæдбæл Комитет æма иннæ ведомствити бæрни.

Бæрæгбонмæ аккаг хузи бацæттæ кæнуни фæдбæл æмбурди радзубанди кодтонцæ æма фæндитæ бахастонцæ 58-аг æфсади командæгæнæги хуæдæййевæги ихæстæ æнхæстгæнæг Александр Неофидов, Цæгат Иристони Сæргълæууæги унаффæгæнæг Бокоти Эльбрус, Дзæуæгигъæуи бунæттон хеунаффæйади администраций æма хецаудзийнади иннæ структурити минæвæрттæ.

Æмбурди кæронбæттæни Сергей Меняйло, бæрæгбони мадзæлтти пълани ахедундзийнадæ фæббæрæг кæнгæй, еугур бæрнон косгутæн дæр бафæдзахста, цæмæй Уæлахези 80 анзей юбилеймæ цæттæдзийнади фарстатæ æнхæст кæнунмæ уа бæрнонæй-бæрнондæр цæстдард.

* * *

Аци хабар нин фегъосун кодта нæ республики Сæргълæууæг æма Хецауади пресс-службæ. Мах ба имæ уой бафтауйнаг ан, æма Цитгин Уæлахези кадæн æрмæгутæ, куд нуриуæнгæ, уотæ идарддæр дæр мухургонд цæудзæнæнцæ. Сæрмагондæй мухургонд цæудзæнæнцæ æрмæгутæ, Уæрæсей аци анз Фидибæстæ гъæуайгæнæги Анзбæл нимад ке цæуй, уой фæдбæл дæр.