Дзæуæгигъæу æй номдзуд театралон архайæг Евгений Багратиони фурт Вахтангови райгурæн сахар. Уой фæдбæл берæ рæстæгути дæргъи уоййасæбæл зингæ мадзæлттæ арæзт нæ цудæй. Фал фæстаг цалдæр анзей дæргъи ба еци гъуддагбæл зингæдæр куст арæзт æрцудæй æма цæуй. Нæ номдзуд æмзæнхон ци хæдзари райгурдæй æма е ’ригон бæнттæ кæми рарвиста, е бундоронæй цалцæггонд æрцудæй æма иссæй æ номбæл Хæдзарæ-музей, еудадзуг си арæзт цæуй исфæлдистадон мадзæлттæ. Фарæ ба фиццаг хатт арæзт æрцудæй Еугуруæрæсеуон фестиваль «Вахтагов. Фидиуæзæгмæ над». Аци анз дæр бабæй е арæзт æрцæудзæнæй 6-13 июли. Уой фæдбæл æрæги дзубанди цудæй сæрмагонд æмбурди, разамунд ин лæвардта нæ республики Хецауаи Сæрдар Дзанайти Барис, архайдта си Мæскуй Е. Вахтангови номбæл паддзахадон академион театри  директор Кирилл Кроки хæццæ.

Æмбурди райдайæни Дзанай-фурт райарфæ кодта мæскуйаг театралон минæвайрадæн, театралон аййевади ирæзти сæ æновуд архайди туххæй. Куд баханхæ кодта, уотемæй Цæгат Иристонæн аци цау æй ахсгиаг æма фæткон:

– Евгений Вахтангови номи хæццæ, æ царди хæццæ баст еугур цаутæ нæ цæргутæн æма туристтæн иссæнцæ хъæбæр ахедгæ. Еугуруæрæсеуон театралон фестиваль искæнун никки хъæбæрдæр æрбалвасдзæнæй цæстингас. Хъæбæр æнгъæлмæ кæсæн бæрæгбонмæ.

Кирилл Крок куд фегъосун кодта, уотемæй театралон фестиваль æ программæмæ райсдзæнæй Е. Вахтангови номбæл Уруссаг академион, Тæбæхсæути Балой номбæл Ирон паддзахадон академион театрти, Мариинаг театри филиали гъæунги арæзт равдиститæ æма мадзæлттæ æма æндæр культурон мадзæлттæ.

Бæрæгбон райдайдзæнæй 6 июли «Физкультурникти парад»-æй, рацæудзæнæнцæ Сабурдзийнади проспектбæл, архайдзæнæнцæ си гъæунги сæ исфæлдистадæ æвдесæг театртæ, бунæттон физкультурниктæ, кафти коллективтæ. Уой фæсте Хетæгкати Къостай номбæл парки Мæскуй, Санкт-Петербурги, Воронежи гъæунгти театртæ равдесдзæнæнцæ æхсæз спектакли. Нæ республики цæргутæн сæмæ сæ бон уодзæнæй лæвар бакæсун.

Фæстæдæр бæнтти, 7-12 июли равдесдзæнæнцæ фестивали сæйраг спектакльтæ, уонæми архайдзæнæнцæ Мæскуй, Санкт-Петербурги, Хъазани, Улан-Удэй, Элистай, Рязани театртæ. Кирилл Кроки загъдмæ гæсгæ, сæйраг  программи уæлæнхасæн ма равдесдзæнæнцæ куклати театрти дууæ спектакли дæр.

Билеттæ балхæнæн уодзæнæй Вахтангови хæдзари сайти 19 мартъийæй фæстæмæ.

Дуккаг Еугуруæрæсеуон театралон фестиваль «Вахтангов»-и кæронбæттæн фæууодзæнæй 13 июли бæрæгбони устур концерт Сæребари фæзи, архайдзæнæнцæ си уæрæсейаг зартæгæнгутæ дæр. Изæрæй ба адæммæ æнгъæлмæ кæсдзæнæй ирд æма цæмæдесаг равдист.

Кирилл Крок ма куд бафеппайдта, уотемæй фестивали кæронбæттæни концерти  рæстæг лæвæрд æрцæудзæнæнцæ «Республикæ Цæгат Иристон-Аланий культури, социалон къабази æма креативон индустрий ирæзтмæ зингæ байвæрæни туххæй» премитæ райсдзæнæнцæ, фестивали экспертон совет ке исбæрæг кæна, уонæн. Кандидатти гъæуама бадæтта республикæ.

– Фæстаг рæстæг адæм æвдесунцæ сæ цæмæдесдзийнадæ культурон туризммæ. Дзæуæгигъæумæ ахиддæр уой туххæй цæунцæ. Е гъæуама исуа Цæгат Кавкази культурон сæйраг сахар. Фестивали ихæс æй уомæн фæййагъаз кæнун, – загъта Кирилл Крок.

Æрмæг цæттæгонд æй Цæгат Иристони Сæрагълæууæг æма Хецауади игъосункæнуйнагмæ гæсгæ.