Уогæ ба ирисхъæ хаттæй-хатт цæйбæрцæбæл æгъатир разиннуй æма гадзирахаттæй куд рацæуй адæймагбæл. Хуæрзæрæги дæр ма æнæгъæнæ Иристон сæрустурæй цийнæ кодтонцæ, сæрмагонд æфсæддон операций архайæг не ’мзæнхон Тибилти Маратæн аккаггонд ке ’рцудæй Уæрæсей Бæгъатæри кадгин ном, уой фæдбæл. Æ еци хуæрзеуæг ин Президент Владимир Путин 25 феврали Кремли æ реубæл ку бакодта, уой фæсте Тибили-фурт цубур рæстæги æмгъудæй иссудæй Иристонмæ, æ хеуæнтти æма зонгити хæццæ кæрæдзебæл фæццийнæ кодтонцæ. Уæдта фæстæмæ рандæй е ’фсæддон ихæстæ идарддæр æнхæст кæнунмæ. Уордæмæ нæхстæр кæнуни размæ еугуремæн дæр зæрдитæ æвардта, мæнæ, дан, тугъдон гъуддæгутæ рæхги фæууодзæнæнцæ æма уæмæ нæуæгæй бабæй зиндзæнæн. Бæргæ æвардта уæхæн нифситæ, бæргæ… Фал… ести ахсгиаг исаразун ка иснет кæнидæ æма уой фæдбæл æ дзурд æнæмæнгæ ка исæнхæст кæнидæ, еци сæрæн лæхъуæн аци хатт æ нифсæвæрдæй нæ фæффудæнгъæл кодта… Сæрмагонд æфсæддон операци æнхæстгонд кæми цæуй, уордигæй нæмæ исигъустæй уæззау хабар – е ’фсæддон ихæстæ æнхæст кæнгæй фæммард æй Тибилти Георгий фурт Марат.

Æ уарзон Иристонмæ цардæгасæй фæззиннунæй зæрдæ бæргæ æвардта, фал… Æ райгурæн зæнхæбæл исæмбалдæй сау кири. Е ’носон бунат иссæй Дзæуæгигъæуи Кади Аллейæ.

Е ’вæрæн бони Иристони еугур сахартæ æма гъæутæй æгæрон берæ адæм æрæмбурд æй Дæллаг Санибай. Ами, бæгъатæри цæрæн хæдзари арæзт æрцудæнцæ æ мæрдæгъдæуттæ. Уони рæстæги нæ республики Сæргълæууæг Сергей Меняйло Марати мадæмæ равардта, æ фурт хуарзæнхæгонд кæмæй æрцудæй, еци орден «Иристони кадæн», Уæрæсей гвардий директор инæлар-болкъон Владислав Ершов æма Уæрæсей Бæгъатæр Абайти Юрий ба – Лæгдзийнади орден, кæци Маратæн аккаггонд æрцудæй æ фæсмæрдæ.

Уæрæсей Федераций Национ гвардий æфсæдти сæйраг командæгæнæг, инæлар-болкъон, Уæрæсей Бæгъатæр Виктор Золотов Марати ниййергути æма æ цардæмбали номбæл ци тæфирфæси финстæг исæрвиста Тибилти Марати бийнонтæмæ, уой саударæн митинги æ номæй бакастæй инæлар-болкъон Владислав Ершов. Еци финстæги загъд адтæй: «Цитгин ниййергутæ Георги Дзæрæхмæти фурт æма Ритæ Тепсарихъой кизгæ, хъазар цардæмбал Мæдинæ Таймурази кизгæ. Сæрустур уотæ Маратæй! Æ тугъдон æмбæлтти фæсаууон некæд æрлæудтæй, фал адтæй раззагдæрти хæццæ. Адтæй рæстзæрдæ, еузæрдиуон æмбал, нифсдæттæг командир. Уой туххæй ин исаккаг кодтонцæ Лæгдзийнади дууæ ордени æма Уæрæсей Бæгъатæри ном. Æ цардвæндаг, гъулæггагæн, кæд цубур рауадæй, уæддæр æ алæмæтдзийнадæ уоййасæбæл агъазиау иссæй, æма æ фæсте æностæмæ рæсугъд фæд ниууагъта. Æнзтæ цæудзæнæнцæ, фал æ рохс сорæт цæрдзæнæй адæми зæрдити, æ номхæссæг скъолати, ахурадон кълæсти æма гъæунгти фæрци. Дæнцæн æй хæсдзæнæнцæ ирæзгæ фæлтæртæн…

Дæллаг Санибай мæрдæгъдæуттæ арæзт ку æрцудæнцæ, уæд æдзард тугъдони æ кири рахастонцæ Дзæуæгигъæумæ, Намуси Аллейæмæ. Ами дæр арæзт æрцудæй саударæн митинг. Уоми радзубанди кæнгæй, Цæгат Иристони Сæргълæууæг Сергей Меняйло загъта:

– Тибилти лæхъуæн равдиста Фидибæстæ гъæуайгæнæги алæмæти лæгдзийнадæ. Батальон «Алани»-йи тох кæнгæй, æхсарæ æма бæгъатæрдзийнадæ æвдиста, террористтæн карз нихкъуæрд лæвардта. Марати хæццæ мин ци фембæлд адтæй,  уой рæстæги берæ фæдздзубанди кодтан,  куд хуæздæр гæнæнтæ ес знагбæл фæууæлахез унæн, уобæл. Рохсаг уо, Марат, дæ цард нæ дзиллæй алкæмæн дæр уодзæнæй Райгурæн бæстæбæл æновуддзийнади сæрбæлтау уодуæлдайæй тох кæнуни дæнцæ…

Æфсæддон æгъдаумæ гæсгæ, кирæбæл ци турусатæ адтæнцæ, уони арæхстгай батохгæй, фæннисан кодтонцæ, æдзард тугъдон нæ Фидибæсти сæрбæлтау æ агъазиау æскъуæлхтдзийнæдтæн устур аргъгонд ке цæуй, уой.

Уæрæсей Федераций Национ гвардий 6-7-аг Спецнази номæй Марати фидæн равардтонцæ зæрдæбæлдарунæн тарсурх берет.

Нæ Бæгъатæр æмзæнхон иссирдта  е ’носон бунат. Рохсаг уо, Марат! Бæгъатæртæн ес райгурд, нæ син ес мæлæт…

* * *

Хуæрзæрæги нæ республики еугур скъолати æма астæуккаг профессионалон ахургæнæндæнтти арæзт æрцудæнцæ Тибилти Марати номерæн сахæттæ. Зæгъæн, Дзæуæгигъæуи 46-аг скъолай лæгдзийнади Урок исаразта Уæрæсей Бæгъатæр Абайти Юрий. Æзинæ ба, 4 апърели ами байгон æй сæрмагонд операций архайгути Намуси музей.

ЦАРДВÆНДАГ

ТИБИЛТИ Георгий фурт Марат райгурдæй Горæтгæрон райони, Черменигъæуи 1988 анзи. Дæллаг Санибай астæуккаг скъола каст фæууни фæсте бацудæй Уæрæсей медгъуддæгути министради медæфсæдти Цæгат-Кавказаг æфсæддон институтмæ. 2012 анзи æригон афицер е службæ æнхæст кæнун райдæдта Уæрæсей Национ гвардий сæрмагонд æфсади.

Сæрмагонд æфсæддон операци куддæр райдæдта, уотæ Тибилти Марат адтæй тугъдон цаути рауæнти, архайдта Запорожьей облæсти, Донецк æма Лугански республикити сæребарæдзийнади тугъдон гъуддæгути. Тугъдон ихæстæ æнхæстгæнгæй 2022 анзи ци лæгдзийнадæ æма бæгъатæрдзийнадæ равдиста, уой туххæй æй дууæ хатти исхуарзæнхгин кодтонцæ Лæгдзийнади ордентæй.

Украинаг æрбалæборгутæй Курски облæст иссæребарæ кæнунбæл тугъдтити е ’фсæддон ихæстæ æнхæст кæнгæй лæгдзийнадæ æма бæгъатæрдзийнадæ ке равдиста, уой туххæй Тибилти Маратæн аккаггонд æрцудæй Уæрæсей Бæгъатæри кадгин ном.