Цæгат Иристони мухур æма дзиллон коммуникацити Комитети сæрдарæй æрæги нисангонд æрцудæй Пхалæгати Светланæ. Уой туххæй Указ бафинста республики Сæргълæууæг Сергей Меняйло.

Пхалæгати Ирбеги кизгæ Светланæ райгурдæй 1983 анзи 23 мартъий Дзæуæгигъæуи. 2005 анзи каст фæцæй Цæгат Иристони Хетæгкати Къостай номбæл паддзахадон университети журналистики факультет.

2004-2005-аг æнзти куста Сувæллæнтти исфæлдистади республикон галауани сабийти телевизион студи «Пеликан»-и редакторæй; 2005-2006-аг æнзти – телевизион канал «Классика»-йи информацион программити служби шеф-редакторæй; 2006-2018-аг æнзти – Æнæнхæст бæрнондзийнади æхсæнадæ «Наше радио»-йи (радиостанцитæ «Европа Плюс», «РетроFM», «Авторадио», «Русское радио») Дзæуæгигъæуи нæуæг хабæртти служби хецауæй; 2020 анзæй 2025 анзи уæнгæ – Цæгат Иристони Региони разамунди центри редакторæй.

Ес ин бийнонтæ, гъомбæл кæнуй фурт.

Пхалæгати Светланæн арфæ кæнæн, уæхæн бæрнон къабази разамонæгæй нисангонд ке ’рцудæй, уой фæдбæл. Æма ин нæ зæрдæ зæгъуй, цæмæй æ куст уа æнтæстгин, нæ республики мухур æма дзиллон коммуникацити идарддæри райрæзти гъуддаги берæ арфиаг гъуддæгутæй куд фæббæрæг уа, уой.