Тугъди сувæллæнттæ… Аци загъд ни ка нæ фегъуста æма, ци амонуй, уой ка нæ зонуй, уæхæн нæ разиндзæнæй. Уæдта етæ ци гъезæмæрттæ бавзурстонцæ, уомæй син ка нæ тæрегъæд кæнуй æма, цæмæй абони ма сæрæгас ка ’й, уæддæр етæ сæ зæруай кари бацæугæй, рæвдуд куд уонцæ, уой ни ке зæрдæ нæ зæгъуй, уæхæн дæр, æвæдзи, нæ разиндзæнæй.

Уогæ – ефстæгтæй уæлдай. Уæхæн æздæх си хумæтæги нæ кæнæн. Уомæн æма, еци тæрегъæддаг сувæллæнттæ исбоц кæнуни туххæй закъони фарс рæстзæрдæ адæм æнæгъæнæйдæр кæд дзорунцæ, уæд гъуддаг кæмæй аразгæ ’й, етæ ба ниффæрскъæ ’нцæ, нæ арази кæнунцæ, уой исцардгъон кæнунбæл. Гъе уони фудæй, тугъди æверхъау рæстæгути хестæрти фарсмæ æмхъиамæтгæнæг ка иссæй æма уоййасæбæл уодуæлдайæй еци сувæллæнттæ ке сæрбæлтау фæхъхъазауат кодтонцæ, еци Фидибæсти ’рдигæй ба нерæнгæ дæр ма æргъудигæнæг нæййес.

Уомæн еума æвдесæн иссæй е дæр, æма нæ Уæлахези цуппаринсæй анзей кадæн цитгингæнæн мадзæлттæй дæр бабæй сæ, æнгъæлдæн, фенæхай кодтонцæ. Зундгонд куд æй, уотемæй бæрæгбони размæ Устур Фидибæстон тугъди хъазауатонтæ хуарзæнхæгонд æрцæудзæнæнцæ сæрмагонд феддонтæй – цуппаринсæй мин соми райсдзæнæнцæ тугъди архайгутæ æма инвалидтæ, сæрæгас си ка нæбал æй, уони цардæмбæлттæ, уæдта майдантæ «Блокадон Ленингради цæрæгæн», «Æрхъолагонд Севастополи цæрæгæн», «Æрхъолагонд Сталингради цæрæгæн» лæвæрд кæмæн æрцудæнцæ, етæ. Уойбæрцæ феддон аккаггонд цæуй концлагерти раздæри æнагъон ахæститæн дæр. Фæйнæ финддæс æма дууинсæй мин соми райсдзæнæнцæ фæскъилдуни фæллойнæгæнгутæ æма концлагерти раздæри æнхæсткаргун ахæститæ… Тугъди сувæллæнтти кой си нæййес. Уотемæй ба уони банимайун дæр æгæрдæр ма бæргæ æнгъезуй… Етæ дæр, баруагæс уи уæд, сæ гæнæнтæ æма равгитæмæ гæсгæ сæ хъиамæтти хай бахастонцæ Уæлахези сæрбæлтау гъуддæгутæмæ. Мадта етæ уæди æверхъаудзийнæдти фудæй ци гъезæмæрттæ бавзурстонцæ, уомæн ба уотид загъдæй зæгъæн дæр нæййес.