Хестæртæ ма хуарз гъуди кæндзæнæнцæ, советон æгъдæуттæ æма фæткитæ ма сæ тæмæни ку адтæнцæ, уæд цæйбæрцæбæл зæрдтагондæрæй бæрæггонд цудæнцæ нæ цитгийнаг бæрæгбæнттæ. Уæлдайдæр ба Уæлахези бон – уæд дзиллæ кæми гъæубæстæ еумæйагæй, кæми ба синхгай æрæмбурд уиуонцæ хестæрæй-кæстæрæй. Еумæйагæй фæммийнасæ, фæццийнæ кæниуонцæ. Е син берæ рæстæгути дæргъи уидæ зæрдæхцæуæндзийнадæ.

Уæдмæ рæстæгутæ куддæр æнахуртæ кæнун байдæдтонцæ, æма еци æгъдау дæр æрнидæн æй. Фал уæддæр, ка ма ’й æрæййафта, уонæй иронх нæй, æрхун ибæл кæнунцæ. Уæдта ма куд рабæрæг æй, уотемæй хестæрти имисуйнæгтæй æй ка зонуй, уонæн дæр зæрдæмæдзæугæ ’й.

Уомæн æвдесæн иссæй, еци еугурадæмон æгъдау иснæуæг кæнунбæл аци анз зæрдиагæй ке байархайдтонцæ Чиколай Сталини номхæссæг гъæунги цæргутæ. Нæ Цитгин Уæлахези цуппаринсæй анзей бæрæгбони размæ райони социалон ефтонгкæнуйнади сæргълæууæг Тускъати Рамазани кизгæ Жаннæ, агъазгæнæг ба ма ин иссæй Тускъати Вовæ, уотемæй сæ гъæунги цæргути хæццæ раунаффæ кодтонцæ, цæмæй алли хæдзари размæ дæр æвæрд æрцæуонцæ, бийнонтæй Устур Фидибæстон тугъди рæстæг фронти, кенæ фæскъилдуни Уæлахези сæрбæлтау ка бахъиамæт кодта, уони къартæ. Адæм еугурæйдæр уобæл зæрдиагæй исарази ’нцæ, æма гъуддаг арæзт æрцудæй. Гъæунгæ еци къартæй хъæбæр исфедудта.

Мадта 9 Майи бæрæгбон дæр синхбæстæ еумæйагæй исбæрæг кодтонцæ. Гъæунги æвæрд æрцудæй тугъдон-будуйрон цæлгæнæн. Еци гъуддаг исаразунбæл байархайдтонцæ Темурти Таймораз æма Тетцойти Дианæ. Уоми иуазгутæ æма гъæуи цæргути фæххинстонцæ æфсæддон касæй. Хестæртæ кувтонцæ Устур Хуцаумæ, æримистонцæ Уæлахези сæрбæлтау сæ цард нивондæн ка ’рхаста, еци тугъдонти рохс нæмттæ…

– Махæн, аци мадзал исаразгутæн нæ нисан æй, цæмæй Райгурæн бæсти сæрбæлтау тугъди хъазауатонти бæгъатæрдзийнадæ æма æскъуæлхтдзийнадæ иронх ма уа, цæмæй уæлахез æрхæсгути цитгин  нæмттæ æностæмæ дзиллити зæрдити цæронцæ, уæлдайдæр ба, цæмæй кæстæр фæлтæртæн уонцæ зæрдтагон æма цитгийнаг. Нур, аци гъæунгæбæл ка рацæуа, етæ уиндзæнæнцæ нæ намусгин тугъдонти цæсгæнттæ… Неке æй иронх, неци æй иронх, – зæгъуй Тускъати Жаннæ.

Æма, махмæ гæсгæ, сæ еци фæндæ арфиаг дæр æй, уæдта хъæбæр ахедгæ æнхæстгонд дæр цæуй.

БИЧИЛТИ Алетæ