Нæ номдзуд поэт æма рохситауæг Малити Геуæрги (1886-1942) æ уацтæй еуеми уотæ финста: «Æ маддæлон  æвзаг зонгæй æй, дæлдæр ка фæккæнуй, уæхæнттæн мæ æрфæндуй зæгъун: «Ци бегарæ дæбæл ес, дæумæ ка игъосуй, еци адæмæн æцæгæлон æвзагбæл дзорун?..» Еци загъд  нин абони дæр ахсгиаг æй, гъæуама ’й нæ зæрдæмæ есæн фæдзæхсти хузæн æма нин имонау уа нæ маддæлон æвзаг, æ кадæй æй цитгин кæнæн. Уобæл дзурдтонцæ, мæнæ евгъуд цуппæрæни, 15 майи нæ маддæлон æвзаг æма литератури бæрæгбони Малити Геуæргий рохс ном æримисуни туххæй Дзæуæгигъæуи æ циртдзæвæни рази ци дзиллæ æрæмбурд æй, етæ дæр. Хуарз уидæ, уоми ци гъудитæ æма фæндитæ райгъустæй, етæ царди ку фæббæрæг уиуонцæ бæлвурд гъуддæгутæбæл архайгæй. Уæд нæ маддæлон æвзаги уавæр уоййасæбæл сагъæссаг нæбал уидæ. Сагъæссаг ба нерæнгæ ма берæ цæмæйдæрти æй, æма уой туххæй æрмæг ба кæсетæ 4-5-аг фæрстæбæл.