Аци анзи, райдайæнæй нуриуæнгæ Уæрæсей Социалон фонди цæгатиристойнаг хайадæ 2010 сувæллонемæн, сæрмагондæй курдиадæ бадæттун нæ гъудæй, уотемæй байгон кодта адæймаги индивидуалон хигъди фæдзæхстадон номер (СНИЛС).

Сувæллони индивидуалон хигъдæн документтæ исаразуни фæткæ 2020 анзæй фæстæмæ æнхæстгонд цæуй проактивон уагæй ЗАГС-и оргæнти ист бæрæггæнæнти бундорбæл. Сабийи СНИЛС барветунцæ портал «Госуслуги»-й мади «личный кабинет»-мæ. Рæстбæл нимад хигъдон финст портали кæмæн ес, еци ниййергутæн ес амунд электронон лæггадæй пайда кæнуни фадуат.

Ниййерæгмæ регистраци æма хигъдон финст кæд нæййес, уæдта паспорт æма сувæллони райгурди туххæй æвдесæндари хæццæ амунд хайади клиентон службæмæ, кенæ берæкъабазгин центри офистæмæ бахатæг адæймагæн ес сувæллони адæймагон хигъди номер райсуни барæ. Фæдзæхстадон номер раттунцæ курдиадæ барветуни бон. Социалон фонди цæгатиристойнаг хайади разамонæг Милдзихти Аслан уотæ зæгъуй:

– Сувæллæнтти гъомбæл кæнунмæ ка райста, айдагъдæр уæхæн бийнонтæн багъæуай кодтан СНИЛС-æн документтæ курдиади фæрци исаразуни фæткæ, уомæн æма гъæугæ бæрæггæнæнтæ фегъосун кæнуни барæ ес айдагъдæр сувæллæнтти гъомбæл кæнунмæ райсæг адæммæ. Курдиадæ бадæттуни дзаман аци адæймæгути ихæс æй гъомбæл кæнунмæ ист сувæллони райгурди туххæй æвдесæндар, уæдта сувæллони гъомбæл кæнунмæ есæг ниййерæги паспорт бавдесун.

СНИЛС гъæуй:

– сабийæн æнæмæнгæ æнхæсткæнуйнаг медицинон фæдзæхстади полис райсунæн;

– лæвар медицинон лæггæдтæй сæйгæдæнтти æма поликлиникити пайда кæнунæн;

– æндæр социалон гъуддæгутæн.

СНИЛС агъаз кæнуй адæймаги туххæй бæрæггæнæнтæ ведомствити еумæйаг архайди бавдесунæн. СНИЛС-и агъазæй аллихузон паддзахадон лæггæдтæ бакæнунæн æма социалон льготитæ банхæст кæнунæн паддзахадон структуритæ хуæдбарæй гъæугæ документтæ байагорунцæ, æма уотемæй аллихузон ведомствитæмæ бавдесунæн гъæугæ гæгъæдитæ райсунæн адæм харз кæнунцæ минкъийдæр рæстæг.

Уæрæсей Социалон фонди еумæйаг контакт-центр:

8-800-100-00-01 (телефонæй бадзорæн ес лæвар; регионалон хайади кусти фæткæ: адвисæрæй цуппæрæнмæ – 9 сахаттемæй 18 сахаттей уæнгæ, майрæнбони ба – 9 сахаттемæй 16 сахатти æма 45 минутти уæнгæ).

Уæрæсей Федераций Социалон фонди цæгатиристойнаг хайади пресс-службæ