Ахури анз кæронмæ куд æрхъæрттæй, уотæ бони фæтки нæуæгæй æрлæудтæнцæ скъоладзаути сæрдигон фæлладуагъд æма æнæнездзийнадæ фæффедардæр кæнуни кампанимæ цæттæдзийнади фарстатæ. Профилон ведомствити минæвæртти докладтæмæ гæсгæ, скъолати размæ лагертæ æма æндæр фæлладуадзæн-дзæбæхгæнæн центртæ куд косдзæнæнцæ, уой фæткæ нерæнгæ бæлвурд æй.

Куд алли анз, уотæ аци хатт дæр сувæллæнтти сæрдигон фæлладуадзæн мадзæлттæ райдайдзæнæнцæ 1 июни. Æнагъонти фæлладуадзæн æма æнæнездзийнадæ федардæр кæнæн косæндæнтти цæттæдзийнади гъуддаги фиццаградон æргом æздæхт цæуй санитарон кæдзосдзийнади домæнтæмæ, зингисервæзтитæ æма æндæр æнæнгъæлæги цаутæй æдасдзийнади, лагерти гъомбæлкæнуйнæгтæмæ медицинон цæстдарди уагæвæрдтитæмæ.

Еци нисантæбæл бакустонцæ ахурадæ æма науки, фæллойнæ æма социалон ирæзти республикон Министрадтæ. Уæрæсей Федераций Æнæнгъæлæги уавæрти министради регионалон управлени æма æндæр цæстдарæг ведомствитæ.

Куд нисангонд цæуй, уотемæй аци сæрди фæлладуадзæн æма дзæбæхгæнæн мадзæлттæ рахъæртдзæнæнцæ 22,4 мин сувæллонемæй фулдæребæл. Уонæй 18 мин æнагъони сæ фæллад исуадздзæнæнцæ скъолати рази косæг лагерти, 4,5 миней бæрцæ ба рабалци кæндзæнæнцæ фæлладуадзæн æма æнæнездзийнадæ федаргæнæн стационарон центртæмæ.

Бæрнон ведомствити разамонгути игъосункæнуйнæгтæмæ гæсгæ, байгон кæнунмæ цæттæ ’нцæ скъолати размæ 159 лагери. Уонæй уæлдай, сувæллæнттæн фæлладуадзæн æма дзæбæхгæнæн лæггæдтæ кæндзæнæнцæ Республикæ Цæгат Иристон-Аланий Фæллойнæ æма социалон ирæзти министради дæлбарæ косæг аст стационарон центри æма Кавкази Минералон Дæнтти региони дууæ лагери.

Ахурадæ æма науки Министради (аци ведомствæ комкоммæ бæрнон æй скъоладзаути сæрдигон фæлладуадзæн фарстатæбæл) куд радзурдтонцæ, уотемæй лагертæ æма иннæ фæлладуадзæн центртæмæ балцæгтæ фиццаградон æгъдауæй дехгонд цæудзæнæнцæ сæрмагонд æфсæддон операций архайгути сувæллæнттæн, царди тухст уавæрти бахауæг бийнонти кæстæртæн, уæдта æндæр уæлæнхасæн социалон агъазгъæуагæ ка ’й, еци къуæртти минæвæрттæн.

Министради минæвари дзубандимæ гæсгæ, бундорон цалцæги фæсте скъоладзаути нæуæгæй исиуазæг кæндзæнæй сувæллæнтти исфæлдистади республикон Галауан  – уоми дæр июни косун райдайдзæнæй сæрдигон лагерь.

*  *  *

Куд нисангонд цæуй, уотемæй сувæллæнтти гъæуай кæнуни Æхсæндуйнеуон бон нæ республики еугур рауæнти дæр исбæрæг кæндзæнæнцæ зæрдæмæдзæугæ мадзæлттæй. Уой фæдбæл Цæгат Иристони Сæргълæууæг Сергей Меняйло республики хецаудзийнади минæвæрттæ æма депутаттæн байихæс кодта, цæмæй сæ æнæмæнгæ бабæрæг кæнонцæ æма фæййагъаз кæнонцæ тæккæ федауцæдæр хузи сæ исæнхæст кæнуни гъуддæгути.