«Информацион тугъдади терроризми идеологимæ нихмæлæудбæл æма экстремизм ма ’руадзунбæл алливæрсуг куст: уæрæсейаг æма фæсарæйнаг фæлтæрддзийнадæ, нæуæг фæрæзнитæ æма хатдзæгтæ» – уæхæн темæбæл наукон-практикон конференци цæуй ЦИПУ-и. Æ исаразгутæ – Цæгат Иристони Национ политикæ æма æндагон бастдзийнæдти министрадæ æма Цæгат Иристони паддзахадон университет.

Уæрæсе берæнацион паддзахадæ ке æй, уомæ гæсгæ си фæззиннуй нихмæлæудтитæ, историон, социалон-экономикон æма политикон разæууæлтæ кæмæн ес, уæхæнттæ. Уони фæстеугутæ ба æнцæ терроризм, экстремизм, æхсæнадæ æма паддзахадæн тæссаг ка æй, уæхæн фæззиндтитæ, уомæн æма, сæхе сæрмагонд идеологимæ гæсгæ, сæдæ, мингай адæмти сæртæ «разелун» кæнунцæ. Кæд комкоммæ нæ, уæддæр нуриккон информацион фæрæзнити агъазæй сæ ардауæн миутæ кæнунцæ нацитæ æма динти нихмæлæуди.

Аци æма æндæр цæмæдесаг фарстатæбæл дзубанди цудæй наукон-практикон конференций. Байгон æй кодта Координацион центри разамонæг, философи æма политологий кафедри сæргълæууæг, профессор Дзæхати Ларисæ.

Конференций архайгутæн, кæцитæн сæ фулдæр адтæнцæ студенттæ, зæрдиагæй райарфæ кодта нæ республики национ политикæ æма æндагон бастдзийнæдти министр Бæгъиати Алан. Æ радзубандий куд баханхæ кодта, уотемæй Уæрæсей гъомусдзийнадæ, æ экономикон æнтæстгин ирæзтæн уæн ес, æхсæнади сабурдзийнадæ, хæлар рахастдзийнæдтæ федар æма цардгъон ку уонцæ, айдагъдæр уæд.

Терроризми идеологимæ нихмæлæуд куд ахсгиаг æй, уæлдайдæр ба – ирæзгæ уодти меддуйне багъæуай кæнунæн, уой туххæй адтæй æ радзубанди ЦИПУ-и проректор, профессор Тенгиз Тиникашвилийæн.

Цæгат Иристони Сæргълæууæги размæ терроризми нихмæ архайди фæдбæл Къамиси нимæрдар Вадим Лесь ба æ радзубандий фулдæр æргом раздахта, кæстæрти раст гъомбæл кæнуни гъуддаги цæйбæрцæбæл ахедгæ æй, ци бийнонти, ци хестæрти ’хсæн ирæзунцæ, уомæ.

Конференций ма цæмæдесаг докладтæ искодтонцæ историон наукити доктор
Дудайти Альберт æма иннæ ахургæндтæ.