Устур Фидибæстон тугъди райдайуни бон – 22 июнь – Уæрæсей нимад æй имисæни æма хъонцгæнæни Бонбæл. Уой фæдбæл аци анз дæр, еци бон нæ бæсти еугур рауæнти дæр арæзт æрцудæй аллихузон номерæн мадзæлттæ.

Уæрæсей Федераций Президент Владимир Путин Мæскуй деденгути бид исæвардта Æнæзонгæ æфсæддони циртбæл. Уомæй иссирдта нæ Райгурæн бæсти сæрбæлтау уодуæлдайæй ка бахъазауат кодта, уони рохс нæмттæ.

Еци бон ма Владимир Путин Кремли фембалдæй 5-11-аг кълæсти ахурдзаутæн историй нæуæг ахургæнæн киунугутæ уадзæг редакторти хæццæ. Фембæлди ма архайдтонцæ Уæрæсей Федераций Президенти агъазгæнæг Владимир Мединский, æхсæнадæмон рахастдзийнæдти Мæскуй паддзахадон институти ректор Анатолий Торкунов, Уæрæсей Наукити Академий еумæйаг историй Институти Наукон разамонæг Александр Чубарьян, уæдта рохсади министр Сергей Кравцов.

ФЕДАУЦÆ  УОДИКОНДÆН ÆВЕДАУЦÆ  ДАРÆСТÆЙ БАМБÆРЗÆН  НÆЙЙЕС!..

Владимир Путин æ радзубандий райдайæни сæрмагондæй баханхæ кодта уой, æма нацистон Германибæл ке фæууæлахез ан, еци гъуддаг æнцойнæ кодта алæмæти федар бундорбæл – нæ адæми æууæндундзийнадæ æма еузæрдиуондзийнадæ сæ Фидибæстæбæл. Еци менеугутæ ба сæ зундрахасти уодæгас кодтонцæ фæткон хæзнати аллихузон ратæдзæнти фæрци: скъолай, дини æма æндæр уодварнæхæссæг гæнæнти фæрци. Ахид цæуидæ æма нерæнгæ дæр ма цæуй, уой дæр нæ нимхæлæугути ‘рдигæй дæр – дзубанди, нæ еци уæлахези бундор комкоммæ æвæрд ке ‘рцудæй скъолай.

– Гъулæггагæн, евгъуд æноси 90-аг æнзти ахурадон программитæ хъæбæр райидард æнцæ историй рæстдзийнади æцæгдзийнадæй, – бауайдзæф кодта Президент. – Дæсгай ахургæнæн киунугутæ фæззиндтæй историбæл, уонæми ба æцæгдзийнадæ, куд гъæуама адтайдæ, уотæ раст æвдист нæ цудæй. Дзубанди дæр ибæл нæййес, мах алкæддæр хуæст адтан, цæмæй хецæн цаутæн аллихузон цæстингасæй аргъгонд цæуа. Фал историон рæстдзийнадæ гъæуама алкæддæр æнхæстæй æма раст æвдист цæуа.