Дигори райони Дур-Дури гъæуи нуртæккæ хъазауатонæй косунцæ æртæ ахсгиаг социалон объектебæл.

Дууæ си æнцæ нæугутæ – 120 бунати кæми уодзæнæй, сувæллæнтти уæхæн рæвдауæндонæ æма спортивон зал. Æртиккаг объект ба æй дуккаг скъолай азгъунст. Уой нур бундоронæй цалцæг кæнунцæ, æма зæронд азгъунст зингæ фæууиндгундæр æй, медæгæй дæр си алцидæр уодзæнæй нæуæг: инженерон коммуникацитæ, уæлдæфкæдзосгæнæн системæ. Тагъд аразгутæ бавналдзæнæнцæ фæрстæ, пъолтæ æма тугурбæл куститæмæ.

Скъолай фалдзости дæр куст æ тæмæни æй – ласунцæ имæ мæрæ, аразунцæ газонтæ, æвæрунцæ си цæгиндзитæ нуриккон рохсгæнæнтæн. Тургъи фæзуат æхгæд æрцудæй рæсугъд æфсæйнаг горенæй, цæттæ ’й агуат.

Исуйнаг рæвдауæндони азгъунст дæр ирæзуй, агоридорæй фæрстæ æвæруй дорамайгути бригадæ Дагестанæй. Хуарз син æнтæсуй, сæ размæ æвæрд ихæсмæ бæрнон цæстæй кæсунцæ, кустити фæткитæ ихæлд нæ цæунцæ.

Сахар Дигорай æрдигæй Дур-Дури гъæумæ æрбацæуæни ба нуртæккæ цæттæ кæнунцæ фæзуат спортивон зали бундор æрæвæрунмæ.

Æртæ объектей арæзтадæ дæр фæдзæхст æй æнæнхæст баргин организаци «Ланæ»-бæл. Æ генералон директор Æгъузарти Зураби разамундæй куститæ æнхæстгонд цæунцæ бæрзонд хуæрзгъæдæдзийнади хæццæ, арæзтадон домæнтæ æма уагæвæрдтæмæ гæсгæ.