Уæрæсей информацион агентадæ «Новости» куд игъосун кæнуй, уотемæй аци анзи фиццаг квартали рабæрæг æй фулдæр коррупцион фудракæндтæ. Зæгъæн, кæд æма 2024 анзи фиццаг квартали коррупцион фудракæндтæ рауадæнцæ 12466, уæд 2025 анзи ба – 15 458, гъома, 25 проценти фулдæр.

Фæстаг æнзти статистикæ куд æвдесуй, уотемæй коррупцион цаутæ баст æнцæ гæртантæ дæттун æма есуни хæццæ. Аци анзи фиццаг квартали дæр гæртан раттуни цаутæ иссæнцæ 60,9 проценти. Нимæдзтæ куд æвдесунцæ, уотемæй минкъий гæртантæ дæттуни цаутæ фæмминкъийдæр æнцæ.

Кæд æма 2017 анзи коррупций хæццæ баст цаутæй минкъий гæртантæ дæттуни фудракæндтæ адтæнцæ 48,2 проценти, уæд 2025 анзи фиццаг квартали æрхаудтæнцæ 20,3 проценттемæ. Уомæй уæлдай, гæртан раттуни цаутæ ма ’руадзун, фари еци æмгъуди хæццæ рабаргæй, 25,9 проценти фулдæр фæцæнцæ. Фудгæнгути къуæрттæ кенæ фудгæнгути æмæхсæнадтæ гæртан раттуни цаутæ аци анзи фиццаг квартали исаразтонцæ берæ фулдæр – 1102-æй 1614 цауей уæнгæ.

Экономикæн, социалон къабазæн агъазиау зиан ка ’рхаста, уæхæн коррупцион фудракæндтæ рауадæнцæ 65,7 проценти фулдæр. Фарæ æма аци анзи фиццаг квартали фудгæнгутæ баййафтонцæ æфхуæрд, ци гæртан райстонцæ, уой син фæстæмæ фондз хатти фулдæремæй тæрхондони унаффæй бафедун кодтонцæ, уомæй уæлдай ба ма ахæстдони дæр фæббаддзæнæнцæ 15-18 анзей уæнгæ.

Прокурортæ ке исбæрæг кæнунцæ, еци фудракæндти туххæй ци уголовон гъуддæгутæ байгон кæнунцæ, уони бæрцæ иссæй æртæ мини. Уæрæсей Генералон прокурор Игорь Краснов куд зæгъуй, уотемæй фондз анземæ коррупционертæй паддзахадон къазнамæ æздæхт æрцудæй 800 миллиард соми. Ци ес-бестæ адтæй еци коррупцион фудгæнгутæмæ, уой аргъ ба рауадæй 36,4 миллиард соми.

…Нæ адæммæ ес уæхæн загъд «Зудæгæнагæн æ комидзаг нæ тайуй!..» Кæмæ куд кæсуй, фал аци загъд ба нæ нури цардарæзти уавæртæмæ гæсгæ бустæги раст нæй. Еугурадæмон есбойнадæй фæррадавæ-бадавæ кæнуни равгæ кæмæндæриддæр фæцæй æма еци æнауæрдонæй ка фæххæлæф кодта, уонæн сæ тъайлагæй-тъайлагдæр агъазиау комидзæгтæ æгæрдæр ма тайунцæ. Уой дæр айдагъ сæхецæн нæ, фал сæ зæнæгæн, уони цæуæтæн…

Уогæ уотæ айдагъ махмæ, Уæрæсей нæй, фал дуйней æндæр паддзахæдтæй беретæми дæр.