Федераций Совети экономикон политики Комитети сæрдар Андрей Кутепов си сæрдареуæг кодта, уотемæй Уæрæсейаг парламенти уæллаг палати æрæги арæзт æрцудæй урухгонд æмбурд, кæцими бæлвурдæй æрдзубанди кодтонцæ нæ бæсти историон-культурон циртдзæвæнтæ гъæуай кæнуни фарстатæбæл. Мадзали архайдтонцæ хецаудзийнади федералон æма регионалон оргæнти бæрнон косгутæ. Цæгат Иристони номæй си адтæнцæ нæ республики премьер-министр Дзанайти Барис, Федераций Совети иуонг Цæгат Иристонæй Виталий Назаренко æма нæ республики культури уодварни хæзнатæ гъæуайгæнæн æма си пайда кæнуни фæдбæл Комитети сæрдари хуæдæйевæг Чехойти Людмилæ.

Фембæлди райдайæни Андрей Кутепов æ радзубандий уотæ баханхæ кодта:

– Нæ Комитетæн ихæсгонд æрцудæй, цæмæй 2025 анзи кæронмæ Уæрæсей Федераций культури министради хæццæ еумæ бацæттæ кæнæн нæ бæсти историон-культурон циртдзæвæнтæ гъæуай кæнун æма сæ исонибони реставраци кæнуни программæ. Куд нисангонд цæуй, уотемæй программæмæ хаст æрцæудзæнæнцæ культурон уодварни 1400 объектемæй фулдæр.

Сенатори дзубандимæ гæсгæ, нуртæккæ сæйрагдæр æй, цæмæй региони бабæстон кæнонцæ, сæ уавæр зæрдæдзоргæ кæмæн æй æма фиццаг кезуй æгъдауæй багъæуай кæнун ке гъæуй, еци историон-культурон циртдзæвæнти номхигъд.

Уой фæдбæл адтæй Уæрæсей культури министри хуæдæййевæг Владимир Осинцеви радзубанди дæр:

– Фиццаги-фиццагдæр бал еци объекттæ ’рцæудзæнæнцæ консервацигонд, гъома, æхгæд, цæмæй идарддæр мабал ихæлонцæ. Æма уотемæй ба архайд цæудзæнæй сæ исрæвдзæ кæнунбæл.

Æмбурди æ радзубандий Дзанайти Барис дæр куд фегъосун кодта, уотемæй Цæгат Иристон гъæздуг æй культурон уодварни хæзнатæй, æма уони æнхæстæй багъæуай кæнун ахсгиаг ихæс æй, еуемæй, цæмæй си хайгин уонцæ исонибони фæлтæртæ, уæдта ин ес æведуйгæ ахедундзийнадæ еци фæлтæрти гъомбæладæн, цæмæй зононцæ сæ фидиуæзæги евгъуд дзаманти æвдесæндартæ, сæрустур си уонцæ.

– Нæ фадуæттæ куд амонунцæ, уотæ архайæн еци циртдзæвæнти цалцæг æма райарæзтбæл, цæмæй исонибони фæлтæртæмæ дæр æнæгъигæдардæй бахъæртонцæ. Уæхæн историон-культурон циртдзæвæнти номхигъди нуртæккæ ес 717 объекти (уонæй 412 æнцæ федералон нисанеуæги циртдзæвæнтæ). Еци объекттæй консерваций мадзæлттæ тæккæ фиццаг ци 20 циртдзæвæнебæл исаразун гъæуй, уони туххæй æрмæгутæ афойнадæбæл балæвардтан культури федералон министрадæмæ. Нæ зæрдæ дарæн, фарста лухгонд ке ’рцæудзæнæй, уобæл.

Æмбурди ци фарстатæбæл цудæй дзубанди, уони фæдбæл æмбурди архайгутæ исфедар кодтонцæ сæрмагонд амунддзийнæдтæ федералон ведомствитæ æма хецаудзийнади регионалон оргæнтæн.

Республикæ Цæгат Иристон-Аланий Сæргълæууæги æма Хецауади пресс-службæ