Æма бабæй нæ кадгиндæр бæрæгбæнттæй еуей афонæ ралæудтæй – сабати, 2 августи бæрæг кæндзинан Задæлески Нанай цитгингæнæн бон. Задæлески Нана ка ’й æма ин æ номбæл уоййасæбæл парахаттæй сæрмагонд бæрæгбон цæмæн бæрæггонд цæуй, уой, махмæ гæсгæ, амонун нæ гъæуй – уотемæй дæр еци хабæрттæ зундгонд æнцæ. Фал уæддæр цубурæй ба зæгъдзинан уой, æма недзаманти нæ адæмихатт е ’знæгти азарæй бунисæфт ку кодта, дзилагæ си æгириддæр нæбал байзайдзæнæй, зæгъгæ, ку истæссаг æй уавæр, уæд аци силгоймаг нæ фидтæлтиккон цæрæнбунæттæбæл æвæллайгæй зилдæй æма æмбурд кодта, уæди æверхъауæй-æверхъаудæр уавæрти ма ка райервазтæй, еци сувæллæнтти. Сæ багъæуай кæнуни зæрдтæй сæ бафæсвæд кодта Дигоргоми, нури Задæлескæ кæми ’й, уой фалдзос лæгæти. Цийфæнди зин æма тæссаг кæд адтæнцæ уавæртæ, уæддæр сæбæл мади рæвдудæй ауодудта, исгъомбæл сæ кодта. Ка си куд байлæгъ кодта, уотæ си алкедæр хецæн бийнонтæ аразта… Гъе уотемæй, е ’цæг ном æнæзундгондæй кæмæн байзадæй, фал адæм ба зæрдиагæй Задæлески Нана, зæгъгæ, хонун ке байдæдтонцæ, еци силгоймаги хъазауати фæрци нæ адæмихатт нæуæгæй исцардгъон æй…

Гъе уомæ гæсгæ рагон дзамантæй ардæмæ алли анз дæр æ кадæн Задæлески арæзт цæуй сæрмагонд адæмон бæрæгбон. Æрæги уæнгæ ’й фулдæр бæрæг кодтнцæ Дигоргоми дзиллæ. Фал æ ахедундзийнадæ æгæрон ахсгиаг ке ’й, уомæ гæсгæ ба нимад æрцудæй республикон бæрæгбонбæл.

Мадта еу рæстæги ба фæззиндтæй уæхæн фæндæ дæр, цæмæй ин нæ республики сахари уиндгундæр рауæни мемориалон циртдзæвæн дæр æвæрд æрцæуа. Е циуавæр уа, уой исбæлвурд кæнуни туххæй исаразтонцæ исфæлдистадон конкурс дæр. Уоми архайдтонцæ берæ скульптортæ. Нæкæси, мæнæ абони ци циртдзæвæни къарæ мухур кæнæн, е дæр æй еци ериси бавдист куститæй еу – исистан æй социалон хизæгтæй, ка ’й исаразта, е си, гъулæггагæн, амунд нæй.

Задæлески Нанайæн мемориалон циртдзæвæн Дзæуæгигъæуи ниввæруни фæндæй нерæнгæ нецима рауадæй. Уæдта си ести уайгæ ба ракæндзæнæй? Фарстати фарста…

Задæлески Нанай хъазауати туххæй нерæнгæ берæ аллихузон æрмæгутæ финст æрцудæй æма ма, æруагæс ни кæнуй, никкидæр ма финст æрцæудзæнæй. Мах абони ниммухур кæнунæн равзурстан нæ республики адæмон финсæг Хъайтухъти Азæмæти финст уац.