«Æригон» – аци зæрдæхцæуæн ном хумæтæги лæвæрд не ‘рцудæй уæ фембæлдæн. Уомæн æма сумах айтæ – искурдиадæгин, гъомусгин, хъæппæресгин студенттæ – нæ алæмæти есбес, нæ Фидибæсти сæйраг нифс. Сумахæй аразгæ ‘й уæ регионти исонибон дæр æма нæ еумæйаг Райгурæн бæстæ – Уæрæсей исонибон æнæгъæнæй дæр. Уæ зонундзийнæдтæ, хиццаг фæндитæ æма хъæппæрестæбæл æнцойнæ кæндзæнæй нæ исонибон. Хъæбæр федарæй ми æруагæс кæнуй, форуми ци бæнттæ рарветайтæ, етæ уин цæмæдесаг æма пайдайаг ке уодзæнæнцæ, е. Базонгæ уодзинайтæ нæуæг адæми хæццæ, райсдзинайтæ нæуæг  зонундзийнæдтæ, фæххуæрзефтонг уодзинайтæ кæрæдзей фæлтæрддзийнадæй… Æма еугур еци хуæрзтæй фæххайгин уодзинайтæ – иуазæгуарзон Иристони алæмæти рæсугъд æрдзи гъæбеси!..»

ПЛАТИ Альбинæ

Ауæхæн зæрдиаг арфитæй нæ республики Сæргълæууæг Сергей Меняйло исбоц кодта нæ бæсти студентти форум «Æригон-2025»-и архайгути. Æма ин æ арфи финстæг форум байгон кæнуни фæдбæл мадзали рæстæг æ номæй бакастæй нæ республики Хецауади Сæрдари хуæдæййевæг Плати Альбинæ.

Аци мадзал дæр арæзт æрцудæй нæ региони разамонæг æма зонундзийнæдти федералон центр «Машук»-и хъæппæресæй. Уоми архайунмæ хуæнхаг гъæу Дæргъæвсмæ хунд æрцудæнцæ уæрæсейаг уæлдæр ахургæнæндæнттæ Цæгат æма Хонсар Иристони  фæсевæдæй раздæр каст ка фæцæй æма си нерæнгæ ма  ка ахур кæнуй, етæ – æдеугурæй æхсæзинсæй адæймаги.

Форуми цæттæгæнæн комитети минæвæрттæ куд радзурдтонцæ, уотемæй æ архайгутæн бацæттæ кодтонцæ гъæздуг ахурадон æма хейерхæфсæн программæ – «Машук»-и специалисттæ сæ зонгæ кæнунцæ, фæсевæдæн сæ ахури фæсте сæ зонундзийнæдтæ æма арæхстдзийнæдтæ æнхæстæй равдесунæн равгитæ син циуавæр къабæзти ес, циуавæр æхсæнадон æма кустадон проекттæбæл бакосонцæ, уæдта сæ райгурæн дууæ республикей идарддæри фæрнугадæбæл куд æфтауонцæ, уæхæн æма æндæр ахсгиаг фарстати фæдбæл фæндитæ æма амунддзийнæдтæ.

– Нæ фембæлди нисантæн сæ сæйрагдæртæй еу е æй, цæмæй фæсевæдæн еума хатт сæ зæрдæбæл æрлæуун кæнæн, Иристон æма еугур Цæгат Кавкази  хуæдбундор культурæ, æгъдæуттæ æма историон хæзнатæ куд æгæрон цæмæдесаг æнцæ æма си алкæмæн дæр равгитæ ке ес, æ рауон-циуондзийнадæ æнхæстæй равдесунæн, æ бæлдитæ тæккæ зæрæдæмæдзæугæдæр хузи исæнхæст кæнунæн, – зæгъуй центр «Машук»-и генералон директор, уæрæсейаг æхсæнадæ «Зонадæ»-йи сæрдари хуæдæййевæг Антон Сериков.

Лекцитæ, тренингтæ, мастер-класстæ, æфсæддон службæгæнгути хæццæ, политикти хæццæ амалгъонти хæццæ, культурæ, спорти æма иннæ къабæзти зундгонд минæвæртти хæццæ фембæлдтитæ æма ма берæ æндæр хиццаг мадзæлттæй æнхæст æнцæ форуми архайгутæн сæ бони фæткитæ…

Антон Сериков ма куд баханхæ кодта, уотемæй зонундзийнæдти центр «Машук» æма Цæгат Иристони аци форум аразунцæ, 2023 анзи Петербурги дуйнеуон экономикон форуми ци æмгустади бадзурд бафинстонцæ, уой бундорбæл. «Машук» æма Цæгат Иристон еумæйагæй косунцæ аллихузон еумæйаг проекттæбæл дæр. Æма мæнæ ци форуми кой кæнæн, уой архайгутæн дæр си сæхе æнтæстгинæй бавдесунæн равгæ уодзæнæй.

Уæрæсей фæсевæд æ размæ циуавæр нисантæ æвæруй? Ахур æма кусти циуавæр бæрзæндтæмæ тундзуй? Аци æма æндæр фарстати хæццæ баст адтæй лекци æригон политологти еугуруæрæсеуон форум «Дигория»-йи разамонæг Хугати Заурбегæн. Уæрæсей идарддæри æнæкъулумпи райрæзт æма еци гъуддагмæ æригон фæлтæри байвæрæни туххæй форуми архайгутæн дзубанди адтæй Уæрæсей Федераций Совети размæ Нимæцон экономики фарстати фæдбæл советти иуонг, технологон хуæдбарæдзийнади федералон скъолай бундорæвæрæг Нинæ Яныкинай хæццæ, нуриккон киной аййевадæ фæсевæди цæбæл ахур кæнуй, циуавæр «хæзнатæ» син хæссуй сæ зундирахастмæ, уой туххæй ба адтæй доклад разамунди еугуруæрæсеуон æрмадзæ «Сенеж»-и проректор Михаил Канавцевæн. Ке зæгъун æй гъæуй, форуми архайгутæмæ берæ фарстатæ разиндтæй лектормæ æма иннæ эксперттæмæ. Адтæй сæмæ ахедгæ феппайуйнæгтæ æма æндæр зæгъуйнæгтæ дæр.

Ахурадон мадзæлттæй уæлдай, форуми архайгуæн ес хеерхæфсæн гъæзтити архайуни фадуат дæр. Зæгъæн, адтæй си еристæ топпæй æхсунæй, мастер-класстæ нæ националон кæфтитæй, бæстæзонæн экскурситæ.

*  *  *

Форуми архайгути хæццæ фембалдæй нæ республики Сæргълæууæги æма Хецауади Администраций разамонæг Гобети Ибрагим. Ци берæ фарстатæбæл æрдзубанди кодтонцæ, уонæй сæ сæйрагдæртæ адтæнцæ сæрмагонд æфсæддон операций фæдбæл, æма æригæнттæ цæмæдесæй игъустонцæ еци ахсгиаг гъуддаги цаути хабæрттæмæ.

Еци фембæлди ма архайдтонцæ Плити Исси номбæл сæрмагонд полкки æфсæддонтæ Гринко æма Тайгер, уæдта сæрмагонд æфсæддон операций ветеранти Цæгат Иристони Ассоциаций разамонæг Магкети Олег.

– Хъæбæр федарæй ми æруагæс кæнуй, сумахæй алкедæр, æ равзурст дæснийади архайгæй, устур æнтæстдзийнæдтæй ке фескъуæлхтдзæнæй, – загъта æ радзубандий Гобети Ибрагим. – Уомæн æма сумах нур дæр æвдесетæ рæстаг нисанмæ тундзундзийнадæ, нæуæгдзийнæдтæй пайда кæнунмæ тулавастдзийнадæ. Сæйрагдæр ба е æй, æма уæмæ ес райгурæн Иристони хуæрзагадæн архайунмæ разæнгарддзийнадæ. Æма уин нæ зæрдæ зæгъуй, уæ еци нифсхастдзийнади уин куд бантæса, уæхуæдтæ дæр боз кæмæй уайтæ æма уи мах дæр сæрустур цæмæй уæн, уæхæн арфиаг гъуддæгутæ.

Аци фембæлди архайгутæ еумæ исистонцæ сæ къарæ, кæций мах дæр абони мухур кæнæн.

ГÆТИЙТИ Светланæ