Сæрдæй ма нимайгæ бæнттæ райзадæй, æма бабæй ралæудзæнæй фæззæг. Еци хабар нин алкæддæр цийнаг уидæ берæ æхцæуæндзийнæдтæй, уонæн сæ сæйрагдæр еу – нæ кæстæртæ зæрдрохсæй бакъахдзæф кæниуонцæ сæ уарзон ахургæнæндæнттæмæ. Фал нур еу æма инсæй анзей дæргъи нин фæззæги райдайæни фиццаг бæнттæ исунцæ хъонцгæнæн – зæрдристæй имисæн, 2004 анзи 1-3 сентябри Беслæни фиццаг скъолай ци æверхъауæй-æверхъаудæр фудбæлах æрцудæй, уоми ка бастъалдæй, еци сабийти æма хестæрти рохс нæмттæ.

Аци анз дæр æнхæстгонд æрцæудзæнæнцæ имисæн мадзæлттæ. Уонæмæ рагацау цæттæ кæнуни фæдбæл арæзт сæрмагонд организацион комитетæн æрæги ци æмбурд адтæй, уомæн разамунд лæвардта нæ республики Сæргълæууæг æма Хецауади Администраций разамонæг Гобети Ибрагим.

Æмбурди архайдтонцæ нæ республики Хецауади Сæрдари хуæдæййевæг Плати Альбинæ, æнхæстгæнæг, барадæгъæуайгæнæг оргæнти, Дзæуæгигъæу æма Рахесфарси райони администрацити минæвæрттæ æма «Беслæни мадтæлтæ»-йи комитети иуонгтæ.

Фембæлди лæмбунæг дзубанди цудæй, 1-3 сентябри Беслæни фиццаг скъолай спортзал æма мемориалон комплекс «Изæдти сахар»-и алли анз ци мадзæлттæ исаразунцæ, уонæбæл. Гобети Ибрагим сæрмагондæй баханхæ кодта, уой æма еци бæнтти теракти амæттæгти æримисунмæ ке æрæмбурд уодзæнæнцæ Цæгат Иристони цæргутæ беремæй, тæфирфæсгæнгутæ Уæрæсей алли регионтæ æма фæсарæйнаг паддзахæдтæй, уой туххæй ба ке гъæуй объектти æдасдзийнади мадзæлттæмæ уæлдай æргом раздахун.

Æмбурди хатдзæгтæмæ гæсгæ дзуапдæтгутæн сæ размæ  бæлвурд ихæстæ æвæрд æрцудæй нисангонд æмгъудтæмæ.