Дуккаг дуйнеуон тугъди рæстæг æртæ æмцæдесон паддзахадей (ССР Цæдеси, Америки Еугонд Штатти æма Англий) разамонгутæн Ялти ци фембæлд адтæй, уоми куд бадзубанди кодтонцæ, уотемæй 1945 анзи 9 августи Советон Цæдес Японийæн фегъосун кодта æ нихмæ тугъд райдайуни туххæй. Æма уотемæй Сурх Æфсад райдæдта Дуккаг дуйнеуон тугъди кæронбæттæн хай æнхæст кæнунмæ. Æма ’й исæнхæст кодта дессагæй-дессагдæрæй. Милитаристон Японий нихмæ тугъд рахаста æдеугурæй цуппар æма инсæй бони. Уæди уæнгæ фурæстуд Квантуйнаг æфсади разамунд 19 августи Идард Искæсæни советон сæйраг командæкæнуйнадæн фегъосун кодта, æнæразвæлгъау капитуляцибæл арази ке ’й, уой. Æма еци æфсад бауорæдта Маньчжурий æ тугъдон архæйдтитæ, æ тугъдонтæ ба дзиллонæй сæхе уацари лæвардтонцæ. Фæстæдæр, 2 сентябри ба финст æрцудæй Японий æнæразвæлгъау капитуляций акт. Уоййадæбæл кæронгонд æрцудæй Устур Фидибæстон тугъдæн дæр æма Дуккаг дуйнеуон тугъдæн дæр.

Милитаристон Японий нихмæ тугъди архайдтонцæ иристойнæгтæй дæр беретæ. Уонæй еу – нæ номдзуд балхон Плити Иссæ. Уой туххæй æрмæг кæсетæ.