Гъæууон хæдзаради къабази ка косуй, еци республикон компанитæй цалдæремæн фæстаг рæстæги субсидити хузи лæвæрд æрцудæй 124 миллион сомемæй фулдæр. Еци фæрæзнитæй кустуæттæ аразунцæ донхуарæги системитæ.

Уой туххæй фегъосун кодта Цæгат Иристони Сæргълæууæг æма Хецауади пресс-службæ.

Уой минæвари дзубандимæ гæсгæ, еци фæрæзнитæ хуæрзæрдæмæ ахедунцæ гъæууонхæдзарадон товаруадзгути архайдбæл.

Зæгъæн, компани «Виноградарь Кавказа» еци паддзахадон агъази фæрци донхуарæги системæ аразуй сæнæфсерæдæнтти 260 гектаребæл. Кустуат «Де Густо»-йи ба субсидий фæрæзнитæ нисангонд адтæнцæ 154 гектаребæл донхуарæги системæ исаразун æма 628 гектаребæл донпурхгæнæн машинттæ æрæвæрун.

Ке зæгъун æй гъæуй, нуртæккæ æнхъуæт бæнттæ æма уарунти кадавар рæстæги мелиораций ефтонггæрзтæ уæлдай ахсгиаг æнцæ.

Амунд субсидитæ региони агропромышленнон комплексæн дехгонд цæунцæ национ проект «Хуайраги æдасдзийнадæн – технологон бундор»-и уагæвæрдмæ гæсгæ.